Carnaval 70

Bon aña tur hende. DIARIO ta habri su luna y mey di comentario awe y lo aumenta den pagina segun e actividadnan ta desaroyando.

Awe DIARIO kier cuminza na mustra riba e trabao inmenso cu SMAC tin e aña aki di prop henter e macuto di actividadnan di Carnaval 70, den un ta di schouder y sin mishi cu nada di importancia di ningun actividad.  Corda cu Parada Grandi di Carnaval 70 lo ta Diadomingo 11 di Februari 2024.  Un poco mas cu un luna leu.

Flambeu ta Diasabra

Te asina leu cu e informadornan di DIARIO a logra haya redo, ta mustra cu tin nada di preocupa pa e Fakkeloptocht di Diasabra awor, 6 di Januari 2024. E ta moviendo den bon direccion caba como e prome actividad y ta sali for di Aruba Entertainment Center bin abao pa termina na ex-DOW na Boulevard.  Y loke por a nota cu varios grupo ya caba a entrega nan material na participantenan di Fakkel, durante luna di December.

   Dushi Carnival Group ta bayendo cu tema “Let’s Glow Crazy”, y lo tin animacion musical di Jeon & Band.  OPC Carnival Group ta bayendo Fakkel cu tema “Caya Ta Yama Mi”, cu animacion musical di OREO.  Los Laga Bai lo tin e tema ‘The Greatest Show’ cu animacion di Robert y Solo Banda Show.

   Champagne Carnival Group lo tin tema “The Street Rockers” cu animacion di Tsunami.  TOB Carnival Group lo tin tema “Mysteries of Africa” cu animacion di dos banda, esta ‘N Fuzion y tambe Groove Masters.

   Royal Carnival Group tin e tema “Road Wukkers” y lo tin animacion di NBO Band.  Don Flip Carnaval Group tin e tema “Kings & Queens” cu animacion di Youth Xtreme Band.  Empire Carnival Group lo tin e tema “Empire Será Bonita” cu animacion di Buleria. 

Prins y Pancho ta Diadomingo

Si acaso bo kier hiba un grupo di Prins y Pancho, sea Infantil, Hubenil of Grandi pa 2024, ya bo ta laat.  Como cu inscripcion a cera 31 di December 2023.  E tabata algo cu mester a traha rapido riba dje, como cu e schedule di Carnaval 70 ta basta riba man.  Eleccion mes lo bay ta Diadomingo 7 di Januari 2024. 

Sosten di Guardian Group

Par di siman pasa a tuma luga oficialmente e firmamento di contract hunto cu Guardian Group Fatum y SMAC pa loke ta Carnaval 70, e celebracion di mas grandi pa loke ta bira Aruba su Carnaval.

Presidente di SMAC, sr. Darren van Ommeren ta expresa palabranan di gratitud y satisfaccion pa asina engrandece e partnernan oficial di Aruba su Carnaval 70. SMAC ta trahando for di varios luna pa por pone un carnaval di lustro, carnaval di 70 aniversario.

   Marketing Executive di Guardian Group Fatum, jufr. Elaine Romano ta menciona cu nan compania ta sumamente contento y orguyoso di ta un di e patrocinadonan oficial pa Carnaval 70. Guardian Group ta kere firmemente den duna back na nos comunidad y nada mas bunita cu engrandece e fiesta cultural mas grandi na Aruba cu ta, Carnaval.

   Carnaval ta bida, carnaval ta pega stenchi, carnaval ta baila riba nos camindanan di Aruba y cu Guardian Group Fatum, Carnaval 70 ta bira un realidad! Danki Guardian Group Fatum y na comunidad di Aruba, ban celebra Carnaval 70 sanamente! 

Festivalnan Infantil y Hubenil

Recien a tuma lugar e prome reunion oficial di SMAC hunto cu comision di festivalnan di mucha y e mayornan di e participantenan pa e festival 2024.  Festival di Tumba Infantil/Hubenil ta conta cu 10 participante, di cual tin 4 participante den e categoria infantil y 6 participante den e categoria hubenil.

   Pa loke ta Calypso y Roadmarch Infantil/Hubenil ta kibra record di e ultimo añanan sigur contando cu 24 participante, di cual tin 13 participante den categoria infantil y 11 participante den e categoria hubenil. Total e festival lo conta cu 23 Roadmarch y 9 Calypso.

   Tur e participantenan ta hopi entusiasma y pura pa e dia yega pa nan por participa. SMAC y comision ta super contento pa e cantidad enorme e aña aki pa e festival pa muchanan.  E competencianan di Tumberito, Calypso y Roadmarch pa muchanan ta Diabierna 12 di Januari 2024. 

Preparando pa Tumba

Otro siman Diaranson 10 di Januari 2024, lo bay tin e inscripcion pa Festival di Tumba.  E di 52 competencia mes di Tumba lo bay ta riba Diasabra 20 di Januari 2024. 

Parada di Luz riba Diaranson

E schedule oficial di SMAC pa Carnaval 70, ta indica cu e Parada di Luz San Nicolas a cambia di dia.  E lo no tuma lugar riba Diahuebs, sino a hala un dia prome.  E ta poni riba schedule pa Diaranson 7 di Februari 2024.  Organizadornan a indica cu nan a cambia e dia, pa un mihor coordinacion pa tur hende, debi na e temporada preta di Carnaval 70. 

Blaas a bira Fantasia

Recien durante un encuesta informal, SMAC a tene competencia pa bin cu un nomber nobo pa e “Parada di Blaas”, esta e Ballonenoptocht.  Resultado di esey ta “Parada di Fantasia”.  Y esaki lo bay tuma lugar riba Diadomingo 21 di Januari.  Esaki tambe ta algo otro pa tene cuenta cune.