Carlos Bislip su Jazz Expo t’ey atrobe pa celebra JAM cu concierto gratis na Kulture Café

Celebrando 20 aniversario

ORANJESTAD (AAN): E momento ey di aña a yega caminda, cu gran emocion, ta invita tur amante di musica pa un anochi special di celebracion musical y union cultural. E aña aki Carlos Bislip’s JAZZ Expo ta celebrando su di 20 aniversario. E concierto tan gusta aki lo tuma luga riba dia 30 di april venidero na Kulture Café, San Nicolas. E concierto plania pa cuminsa 6:30 pm di atardi anti lo termina 11:00. Manera semper, entrada ta completamente gratis y tur hende ta bon bini.

   E programa pa e edicion di 2025 lo cuminsa cu e presentacion di Caribbean Combo – cu ta un ensemble di Scol di Musica Rufo Wever bow di direccion di Carlos Bislip. Sr Bislip a comenta cu el a cuminsa cu e ensemble aki na aña 2011 anto cu atraves  di e añanan varios hoben musico a ricibi nan formacion y experiencia musical ciendo parti di e ensemble aki.

   Varios di nan a bira semi professional cu a toca den e diferente festivalnan nacional aki na Aruba. Tambe algun di nan a bay studia musica na Hulanda y na Merca. Pa cu e celebracion di JAM y International Jazz Day e aña aki, Caribbean Combo lo tin tres musico invita. Entrenan ta Roderick Albus cu no ta un musico desconoci aki na Aruba door cu e ta e trompetista di e grupo musical Buleria. E otro musico invita ta Anthony Lubbers cu ta un hoben saxofonista professional cu gradua for di Fontys Academy of the Arts cu recientemente a bin residencia na Aruba. Finalmente e di tres musico invita ta e incomparable Freddie Franken, e Arubiano aki tin un trayectoria bastanta extenso.

   Freddie a biba su bida professional predominantemente na Chicago unda el a traha como musico professional y tambe como professor di Jazz Guitar, improvisacion y tambe director di ensemble na e prestigioso Olivet Nazarene University. Edicion aki di Caribbean Combo ta conta cu algun hoben bastante talentoso y yen di energia. E musiconan di Caribbean Combo ta Emanuel Gonzalez (bass), Christian Bonarriba (Piano), Renzo Diikhuizen (Congas), Derren Grant (Timbal), Sebastian Sanchez ( Bongo y Percussion Menor) Elijah Wester (Drumset).

   E segundo acto di e anochi lo ta e segmento di Jazz Vocals. Carlos ta continua di elabora cu pa edicion aki e segmento di Vocals lo tin 5 cantante, anto cu lo tin 2 cara nobo den e line up. E vocalistanan cu a yega di participa algun biaha caba ta entre otro Solaica Clarinda, Tabitha Heemstad-Smith y Osdelly Wester. E dos hoben vocalistanan ta Soriane Leonard and Reanne Ras. E Banda cu lo acompaña e vocalistanan ta consisti di Johnny Scharbaay, Pierre Koolman, Freddie Franken anto cu Ivan Quandus como director musical.

   E tercer acto cu lo presentation lo ta Lidrick Solognier y su grupo. Lidrick ta un ex alumno di Carlos cu na aña 2019 a parti pa Hulanda pa studia na Codarts na Rotterdam. Sr Bislip a expressa cu e ta sumamente contento cu e desarojo di Lidrick ambos como musico y tambe como compositor. Carlos a splica cu Lidrick ta usa su raisnan cu ta funda profundamente den e folklore Arubiano como su fuente pa su inspiracion. Carlos a mentiona cu Lidrick a studia extensivamente cu Vicente Ras unda el a siña e essencianan di e ritmonan di Aruba riba Tambu. “Lidrick a hiba e arte di toca e Tambu di Aruba na un nivel majestral” esaki ta e palabranan di Carlos. Lidrick lo toca composicionan original anto su grupo ta consisti di algun di e mihor musiconan di Aruba cu ta Reno Steba, Kyle Winklaar, Serghio Jansen, Arthur Kelly anto Pearl “Watra” Dumfries.

   E ultimo presentacion di e anochi lo ta e grupo di Carlos Bislip cu su amigonan. E biaha aki Carlos lo worde acompaña pa Ivan Quandus, Angelo Kock, Franklin Granadillo, John Francis Jacobs, Chris Rodulfo anto cu Yamaal Baptiste. Carlos a  menciona tambe cu Yamaal Baptiste ta un di varios success stories di e Carlos Bislip’s Jazz Expo. Yamaal ta un di e hobennan cu a toca su prome jazz concert den e Carlos Bislip’s Jazz Expo na aña 2007. Na 2010 Yamaal a parti pa Bloomington Indiana pa bay studia Jazz. Na Indiana University Yamaal a haci su Bachelors Degree den Jazz Studies, su Masters den Jazz studies anto su Doctorado den Ethno Musicologia. Na December di 2024 Yamaal a defende su thesis anto awor  Yamaal ta e prome Arubiano cu e titulo di Doctor den musica.

   E celebracion ta forma parti di Jazz Appreciation Month (JAM), un iniciativa anual di e Smithsonian Institute na Washington D.C., destina pa honra e legado, historia y influencia di jazz na mundo. Desde 2011, UNESCO a proclama dia 30 di april oficialmente como InternationalJazz Day, pa rindi homenahe na un di e generonan musical mas universal cu ta traspasa frontera, idioma y cultura.

Na Aruba, JAM tambe a bira un evento anual duna bida danki na Carlos Bislip, kende ta uza e fecha aki pa promove talento local y uni pueblo rond e idioma universal di musica.

   E evento ta posibel danki na e colaboracion di varios entidad manera Oficina di Turismo Aruba, Departamento di Cultura Aruba, UNOCA, Setar, Het Cultuurfonds, Aruba AirportAuthority, Romar Trading y Vibration PR, entre otro.

   Nan ta invita bo pa bin gosa di un anochi di ritmo, energia y pasion. No perde e oportunidad pa forma parti di e celebracion aki. Pa mas informacion, sigui Carlos Bislip, Kulture Café of Vibration PR riba Facebook.

   Corda cu e actividad ta completamente gratis. Lo tin un cantidad limita di stoel, dus bin trempan pa segura bo lugar. Tambe bo mag di bin cu mesun stoel cu mesa y bo ice jug cu bo drinks etc etc.