ORANJESTAD (AAN): Caribbean Mercantile Bank (CMB) N.V., den colaboracion cu CEDE Aruba y e Instituto pa Good Governance y Liderato (GG&L) di Universidad di Aruba,
ta anuncia cu e Heart + Knowledge: Non-Profit Leadership & Governance Conference 2025 lo tuma lugar dia 27 di september 2025 na Hyatt Regency Aruba, di 8:30 am te 4:30 pm.
E conferencia ta dirigi pa fortifica e rol vital cu organizacionnan non-profit tin den nos sociedad. E motibo principal pa organiza e conferencia unico aki, ta pa fortifica liderato y bon gobernanza, pa stimula colaboracion, y pa crea un ecosistema non-profit mas resiliente y sostenibel.
E conferencia lo inclui sesionnan inspiracional y practico cu oradornan di nivel local, regional e internacional. Keynote Speaker: Dr. Michael D. Layton di Dorothy A. Johnson Center for Philanthropy cu lo bin for di merca, e lo elobora ariba e ecosistema global di non-profit y filantropia.
Nan lo tin workshops tambe, esta (*) Board Governance duna pa Hellen van der Wal y Robbert Kroon. (*) Innovative Funding & Business Models, duna pa Gyonne Zafira y Edward Erasmus. (*) Inspirational Talk: Jose Sommers (Foresee Foundation di St. Maarten) cu lo papia ariba resiliencia y innovacion den liderato non-profit.
Durante e interactive session, esaki lo worde dirigi door di Thaïs Franken y CEDE Aruba cu partnernan, cu e meta pa co-crea contenido pa crea capacidad den futuro.
E programa tambe lo brinda momento di networking pa stimula colaboracion entre organizacionnan presente.
Segun CMB a indica: “Ora nos NGO’s ta mas fuerte, henter comunidad ta beneficia di esaki.” “Tambe nos ta kere cu transparencia, liderato y integridad ta fundamental y esencial pa logra confianza, sea pa un banco of pa un organizacion non-profit.” Apoyando e conferencia, CMB ta enfatisa nan compromiso pa eleva nivel di bon gobernansa y transparencia.
Costo di inscripcion pa e conferencia ta 50 Florin (inclui 2 representante pa cada organizacion), y corda cu espacio ta limita, y ta tuma maximo 100 participante.
Registracion ta posibel via e pagina di Facebook di Caribbean Mercantile Bank y CEDE Aruba. Prioridad lo worde duna na e organizacionnan cu a ricibi invitacion di CEDE Aruba, pero tambe lo tin un lista di espera.
Invitacion: Nan ta invita tur organizacion y fundacion non-profit pa tuma parti den e oportunidad unico aki. E conferencia ta uni Heart + Knowledge, pasion pa comunidad cu habilidadnan profesional, pa logra un Aruba mas fuerte, inclusivo y sostenibel.
