Durante Aruba Open Beach Tennis Tournament
ORANJESTAD (AAN): Caribbean Mercantile Bank (CMB) a mustra un biaha mas nan compromiso na e comunidad durante e Aruba Open Beach Tennis Tournament 2025. Durante e evento CMB a entrega un cheque di Afl. 10,000 na Nichole Danser, representante di ScubbleBubbles Foundation, pa sigui apoya nan mision di preservacion marino y educacion ambiental.
Durante e siman, CMB tabatin un Move Shack na e sitio, caminda diferente merchandise tabata disponibel pa bende. Tur producto cu a wordo bendi durante e evento a bay na ScubbleBubbles Foundation.
CMB ta sumamente orgulloso di por contribui na un fundacion cu ta traha cu tanto dedicacion pa cuida nos lama y nos bida marino. E Move Shack tabata un forma interactivo pa involucra e publico y na mesun tempo recauda fondo pa un causa cu ta importante pa futuro di nos isla.
ScubbleBubbles Foundation ta dedica na educacion na nos hobennan, limpiamento di nos costa y conscientisacion tocante sostenibilidad ambiental. E donacion di Afl. 10,000, hunto cu sosten adicional di Beach Tennis Aruba di Afl. 2,000 lo yuda amplia nan proyecto y programa educativo. E gesto aki CMB ta aprecia masha hopi como esaki ta demostra e bon cooperacion entre CMB y BTA.
CMB ta gradici tur hende cu a pasa na nos Move Shack y a contribui na un bon causa y ta spera di sigui hasi colaboracionnan positivo den futuro pa beneficia Aruba y su comunidad.
