Caribbean Arthritis Foundation a presenta un sesion di informacion pa pashentnan di reuma

ORANJESTAD (AAN): Diaranson merdia a tuma lugar den “Arikok”-ballroom di Hyatt Place Aruba Airport un sesion di informacion sumamente interesante pa 40 pashent di reuma,

organiza pa e comision di pashent bou encargo di Caribbean Arthritis Foundation. Un biaha mas e pashentnan di reuma a haya e oportunidad pa ricibi informacion valioso pa asina sigui amplia nan conocimento riba tereno di artritis.

E tabata un sesion di informacion unico, door cu e biaha aki prof. dr. Michael Nurmohamed, reumatologo na VUmc y Reade, a duna un presentacion interactivo. Por cierto un dia prome e tabata e orador principal durante un congreso medico exitoso riba e topico “Cardiovasculair Risico & Management bij Reumatoïde Artritis”.

Prof. dr. Michael Nurmohamed a presenta informacion clave y mas recien, a base di varios estudionan hasi hunto cu otro coleganan profesor na Hulanda, riba tereno di artritis. E tema principal tabata e riesgo y maneho cardiovascular di artritis reumatoide. Un persona cu wordo diagnostica cu artritis reumatoide, durante di su bida tin un chens mas grandi pa desaroya retonan cardiovascular. Na mes momento e profesor a splica esnan presente con nan por influencia e reto nan aki positivamente. 

Caribbean Arthritis Foundation ta enfoca riba e “early diagnosis awareness program” y tin entre otro como reto pa mehora e posicion di su pashentnan, door di informa nan continuamente, pero tambe pa asina nan por tin e oportunidad pa comparti nan experencia cu otro pashentnan durante varios actividadnan planea, pa asina contribui na un mihor calidad di bida. Na fin di e sesion di informacion tur patient a ricibi un buki skirbi pa un escritor Hulandes, compartiendo informacion valioso. Un danki special ta bay pa e Nationale Vereniging ReumaZorg Nederland, cu a hasi e sesion di informacion aki posibel.

Proximo luna Comision Arubano pa esnan cu Artritis tin un otro actividad interesante riba programa.