CAP y Armstrong ta firma un acuerdo pa exploracion di hidrocarburo den area maritimo di Aruba  

ORANJESTAD (AAN):  Compania Arubano di Petroleo (CAP) a anuncia e firmamento di un “Production Sharing Contract”

cu Andicuri Oil & Gas Exploration VBA (AOGX) pa e exploracion, desaroyo y produccion di hidrocarburo den e area maritimo di Aruba.

            AOGX ta un subsidiario local di Armstrong International LLC (“AI”). E ceremonia di firmamento a tuma lugar den presencia di Su Excelencia Evelyn Wever-Croes, Prome Minister di Aruba. E contract su area ta cubri 14,356 km², equivalente na 3.5 miyon hectarea.

            E grupo di Armstrong, entre otro Armstrong Oil & Gas, Inc. (“AOG”) y Lagniappe Alaska, LLC (“Lagniappe”) tin un historia excepcional den exploracion den e ultimo 40 aña, descubriendo  varios campo di petroleo enorme na Alaska incluyendo e campo Pikka di mas cu 2.5 biyon baril (descubri na 2013) y anunciando luna pasa un descubrimento nobo y potencialmente grandi na “King Street #1”. AI a wordo funda pa explora oportunidadnan mundial y aplica e compania su experticio riba e tereno pa sigui busca camponan grandi di petroleo y gas.

            Ademas di e exploracion exitoso den Alaska su clima extremo, e localidad geografico a rekeri pa Lagniappe ehecuta nan operacion bou di regulacion riguroso y alabes manteniendo 20 aña di bon relacion cu stakeholders local, municipal, di e estado y nacional. Esaki tawata un di e elementonan principal considera door di CAP durante negociacion.

            Fuera di nan experiencia na Alaska e team di AOGX tambe ta conta cu varios ehecutivonan cu experiencia exitoso den paisnan alrededor di Aruba. Te e dia di awe, cuatro pos a wordo bora den e area maritimo di Aruba, 3 na ananan 1989/1990 zuidwest di Aruba. E di cuatro, Bon Bini1-X, a wordo bora na 2018 Noordwest di Aruba.

            “Awe un capitulo nobo den Aruba su exploracion pa petroleo a cuminsa oficialmente. Nos mundo y manera di biba ta cambiando y desaroyando constantemente, y hunto cu ne, nos demanda pa energia. CAP su meta ta pa Aruba yega na un independencia energetico y ademas pa haci esaki den un forma responsabel, pa loke ta trata medio ambiente y normanan social” Minister di labor, energia y integracion, Glenbert Croes, a bisa. Un campana di exploracion exitoso lo contribui  na e meta aki y como resultado beneficia Aruba su generacion actual, y ademas generacion den futuro.

            Bill Armstrong, Presidente y CEO di AOG a añadi: Nos ta hopi anima di e potencial di Aruba y nos ta optimista cu nos lo crea valor significante pa e isla bunita aki y su hendenan. Nos ta buscando activamente oportunidadnan mundialmente pa usa nos experticio den exploracion. A base di nos analisis geologico y geofisico preliminario, nos tin indicacion cu tin varios prospecto grandi den awanan di Aruba cu ta parce mane camponan den nos pais bisiñanan di Venezuela, Trinidad y Tobago, Colombia y Guyana. Aruba ta practicamente inexplora. Esaki ta un temporada hopi “exciting” pa Aruba.