Cantidad grandi di remedi fuerte haya scondi mey-mey di fruta

Aduana a confisca varios producto ilegal

• A haya webo empaketa den caha di appel
• Caso awor den man di Recherche

ORANJESTAD (AAN): Remedinan cu bo mester di recept pa nan, semper ta wordo considera como “medicamento controla”, y bo no por djis tuma nan sin consulta di un Docter of profesional medico.

   Tin cierto antibiotica cu no ta funciona pa tur malesa, y tin di corda cu por ehemplo un persona cu ta sufri di presion halto, no por bay bebe diclofenac.

   Awor a sali na cla, cu den dos siman di tempo, oficialnan atento di Aduana Aruba a haci control, y e funcionarionan a bin descubri carganan cu ta tratando di drenta di forma ilegal na e isla.

   E prome carga: Aduana a splica na DIARIO, cu e prome carga confisca aki a wordo detecta riba Diaranson 18 di Januari 2023.

   Den e carga ilegal aki, aduana a bin detecta cu tin un gran cantidad di Caha di Webo cu na un forma magistral a wordo empaketa den ‘Caha di Appel’ cu no a worde declara oficialmente.

   Ta trata di webo blanco cu claro mester di permiso di importacion for di Directie Economische Zaken, Handel en Industrie (DEZHI).

   E di dos carga: Aduana a agrega, cu e di dos carga confisca a tuma lugar antayera, esta Diaranson 1 Februari 2023.

   E biaha aki, e carga a contene un gran cantidad di diferente tipo di medicamento, cu tabata scondi den un container di fruta.

   Y no ta djis remedi cu bo ta cumpra den reki, sino medicamento cu normalmente mester di recept.  Ta trata aki di medicamentonan manera Diclofenac, diferente tipo di Antibiotica, Dolocom, Sildenafil (cu ta Viagra), Ampicilina, Fricilicont, Diclofec Forte, Amoxilina, Gripefin, Mambo y hopi mas.

   Segun Aduana, e carga ey di remedi no a worde declara y tampoco tabata tin permiso di importacion for di Inspectie Volksgezondheid Aruba (IVA).

   DIARIO a nota cu Aduana a confisca e carganan aki, y como cu el a bira un asunto hopi serio y delicado, nan a pasa e casonan pa seccion di Recherche y Informacion (DRI).

   DAA ta percura pa cumpli cu su tareanan fiscal como tambe e tareanan no-fiscal. Den e caso aki riba e tereno di salubridad, ta importante pa preveni carganan ilegal sali den mercado liber y alavez ta proteha e salud di e comunidad di Aruba.