Minister di Salud y Turismo: --- * Na inicio di aña a wak un caida di turismo di casi 30%
ORANJESTAD (AAN): Sector di Timeshare, Airbnbnan, hotelnan tur ta experenciando cancelacionnan den e dianan aki. Esaki ta algo alarmante, asina Minister Dangui Oduber a bisa den conferencia di prensa.
El a agrega cu ora cu ta haci proyeccionnan, ya na comienso di aña a wak un caida di casi 30 porciento. Ora cu turismo cay cu 30% tur hende ta sinti'e directamente.
E minister a remarca cu pesey ta sinti cu ta necesario pa tuma accionnan di biaha. A haya hopi cancelacion di parti di gruponan (group business) cu ta forma parti den gran parti di e entradanan cu ta wordo genera den temporada halto pa e hotelnan grandi.
E temporada aki ta temporada cu hotelnan y e sector di Food & Beverage ta genera mas entrada pa motibo cu e entrada aki tin e prijsnan di camber mas halto y tambe tin su efecto directo, a bisa.
Pesey a dicidi pa no warda mas dia pasa pa cambia e rekisitonan di entrada pa wak si esaki ta cambia e perspectiva di e viahero y pa e lunanan benidero di Februari y Maart, toch mantene na e proyeccionnan cu a haci inicialmente, Minister Oduber a splica.
