WILLEMSTAD: Tur cos tabata trankil riba Diasabra atardi na Aeropuerto di Hato na Curacao,
cu pasaheronan dilanti Gate sperando e momento yega pa nan aborda nan vuelo 370 cu TUI Airlines cu ta bula non-stop pa Amsterdam, Hulanda.
Diripiente pasaheronan a tende un conmocion, y nan a hisa cabez y mira con un homber bisti cu un carson cora kima, cu un polo-shirt blanco ta cuminza bira paranoico cu voz halto.
El a cuminza cana pariba-pabao, y di pazuid-panort den e terminal, gritando na forma histerico, y bisando cu e tin dolor debi cu tin bolita den stoma y cu nan a kibra.
E homber e momento ey a cuminza pasa man pa un boter di awa y cuminza yena su stoma cune, pero esey no tabata yuda cu nada. Un muher cu tabata hunto cune, tambe a cuminza bira hopi nervioso, y ta parce cu e muher no sa nada mes cu e homber tabatin e cosnan ey hinca den su stoma.
Mientras tanto a core pidi security di Aeropuerto pa bin atende e persona, y despues Polis como tambe Ambulans a yega. E homber keto bay tabata pidi pa awa.
Pues envez di viaha rumbo pa Hulanda pa hiba su droga scondi, el a ser transporta cu Ambulans pa Hospital, unda a core saca como 100 bolita yena cu cocaina liquido for di su stoma. Algun di e bolitanan aki a kibra, y esey a cuminza pone e homber aki cuminza sinti malo y pidi yudanza.
Awor e homber ta wordo interoga pa asina haya sa ta kende a dune e bolitanan aki. Tambe e ta realiza, cu si acaso esaki a pasa ora cu e avion tabata mey-mey di Oceano Atlantico, su chens pa sobrevivi lo tabata hopi abao como cu ta dura basta ora prome cu e avion haya un pista di aterizahe e momento ey, y lo a yega Hulanda morto.
Mientras tanto e vuelo di TUI Airlines a subi na su horario normal pa 7:04 pm, sin ningun clase di retrazo. Claro cu nan a saca e maletanan di e homber tambe pa asina esaki wordo examina.
