Parlamentario Hendrik Tevreden, lider fraccion MEP:
ORANJESTAD (AAN)—Den conferencia di prensa di Fraccion di MEP, su lider di fraccion Hendrik Tevreden, a referi na e tema cu ta den boca di pueblo e ultimo dianan aki, cual ta “No more hotels” cu ta e spotnan cu tabata tin riba murayanan y areanan turistico y mas caminda rond di Aruba.
Tevreden ta kere cu mester bay un tiki bek den historia pa sa na unda esaki a cuminza y di con awo tin hendenan rabia y disgusta pasobra tin mas hotel, camber, condominium y resorts.
El a bisa cu na 2017, ora gobierno di MEP a tuma e mando, tabata tin rond di 7.100 mil camber extra, entrega pa ex-minister Benny Sevinger. E toezegging (compromise) aki cu Gabinete Eman 1 y 2 a duna e tempo ey, mester a wordo atendi cune pa e Gobierno nobo cu a drenta na 2017, esta Gabinete Wever-Croes-1. El a reitera cu na 2018 a bin cu voorbereidingsbesluit, pa asina pone un moratorium pa locual ta trata Palm Beach y vecindario, pa no bin mas tereno, mas construccion den e area.
El menciona cu a reduci e tempo ey cantidad di camber di 7.100 pa rond di 2000 camber, cu a wordo duna den pasado pa ex-minister Benny Sevinger.
“E cantidad di cambernan awe na Aruba tin nomber y fam. Tur locual nos ta mira na Palm Beach, Eagle Beach y vecindario cu tin mas cu dos piso, cambernan cu algun di nan ainda ta bashi, cu awe kizas no a wordo construi totalmente, edificionan cu mester wordo termina ainda, tin nomber y fam. E caso Avestruz, cu nomber y fam ta Benny Sevinger. E unico tereno cu Gabinete Wever-Croes a otorga ta e tereno conoci na San Nicolas pa Secrets y mi ta kere cu e motibonan pa esaki ta conoci, pasobra Gobierno di Aruba kier mira un adelanto turistico specialmente den e area di San Nicolas”, Tevreden a enfatiza.
Segun e parlamentario e terenonan cu por mira na Eagle Beach y Palm Beach ta terenonan caro a wordo duna na imigrantenan, y cu por a duna yiunan di tera, e profesionalnan hoben cu kier a lanta un famia, y cu e imigrantenan ta bende na prijs cu nos hendenan local no por paga.
Tevreden a bisa cu si conta tur e cambernan cu a wordo otorga e tempo ey pa señor Sevinger, lo mester tin mas of menos un cantidad di 20 mil hende pa por carga e peso aki den trabao, esta housekeeping, hendenan cu ta handle tur e hotelnan aki, y cu mester imigra pa Aruba pa por atende cu e desaroyo aki. “Esaki ta nifica un peso hopi grandi riba nos pensioen, riba nos seguro medico, pero tambe ta nifica cu lo tin 20 mil trabao menos pa nos localnan; y tambe ta indica cu lo tin 20 mil hende extra riba nos pais, debi na mi parecer, na e maneho desastroso di otorgamento di tereno, cu a culmina por cierto, dilanti Mesa Berde unda cu señor Sevinger, ainda politico di AVP, a wordo condena na seis luna di prison”, Tevreden a remarca.
