Cantidad di adicto ambulante jong na Aruba ta creciendo

Rubiella Toppenberg di FADA: 

*Un centro di rehabilitacion ta algo cu Aruba mester di dje 

ORANJESTAD (AAN):  Aruba tin actualmente casonan tristo pa mira di personanan cu ta ariba caya y cu a cay den mundo di adiccion. Esaki ta algo cu ta lantando cabes un biaha mas na e isla y cu si no ta actua lihe, e situacion por empeora den corto tempo.

            Riba e situacion aki, Rubiella Toppenberg, trahador preventivo di Fundacion Anti Droga Aruba (FADA) a bisa cu nan ta purba hopi biaha pa acerca e personanan aki. Pero ta hopi dificil na momento cu nan ta den un crisis of na momento cu nan ta bao efecto di un of otro substancia.

            El a bisa cu ora cu nan ta mira e cosnan aki nan ta purba hunto cu otro stakeholdernan papia riba esaki pa wak kico por wordo haci. Tin hopi aña ta boga pa un caminda drechi pa pone e personanan aki pasobra di berdad mester di esaki, Toppenberg a enfatisa.

            El a sigui bisa cu tin hopi hoben ariba caya. Den e ultimo lunanan, a yega di wak tres hoben nobo ta cana ariba caya, entre otro hende muher. Ta haci dolor pa wak esaki.

            "Mi ta kere cu ta momento pa di berdad esnan cu tin e tarea pa haci esaki pone un tiki mas atencion na dje, pasobra mi ta kere esaki lo por yuda hopi", a bisa.

            Si den tiki tempo ta mira asina hopi cara nobo, pa fin di aña cuanto mas lo bay tin. Pa otro aña cuanto mas lo bay tin?, a expresa.

            E ta kere c'un centro di rehabilitacion ta algo cu mester di dje, e trahador preventivo di FADA a señala.

            El a agrega cu e personanan aki, na momento cu nan ta bao di efecto di un substancia nan no tin control di nan mes. Na momento cu nan drenta un centro, un of dos dia despues nan kier bay y nan por. Na Aruba no tin 'ondercuratelestelling' mas y tur esaki ta cosnan cu mester bay pone extra atencion pasobra e personanan aki ta un peliger pa nan mes y ora nan ta bao efecto di substancia hopi ta bira un peliger pa otro tambe.

            Un desaroyo importante ta si cu gobierno a aloca un fondo pa tin personanan cu ta bay 'take care' di e adictonan ambulante. Nan ta bay busca nan y zorg pa nan come y baña. Despues ta pone nan bek na nan lugar di custumber.

            Nan ta bay haya atencion y esey toch ta un noticia positivo, a indica.