PRAGA: E cantante checo Hana Horka, kende ta vocalista di e grupo di folk Asonance, a fayece Diadomingo cu 57 aña di edad, despues di a nenga di ricibi vacuna,
y intencionalmente el a contagia su mes cu Covid-19 pa por haya un Carnet di Salud.
Esey ta loke e yiu homber di e artista, esta Jan Rek a bisa den un entrevista cu e emisora iRozhlas, esta cu su mama a contrae e virus pasobra el a expone su mes voluntariamente na e virus sin ningun medida di proteccion. Su tata tambe a haci esey, y nan tur dos a wordo contagia desde luna di December.
“El a djis sigui su bida normal hunto cu nos, y el a prefera di haya e virus envez di busca e vacuna,” e yiu a bisa.
Jan Rek a bisa cu ta hendenan den nan bario cu ta sigui e storianan anti-vacuna, a persuadi su mama pa e no bay busca e hangua contra Coronavirus.
Na Republica Checo nan ta exigi un Carnet di Vacuna, of un Carnet cu ta proba cu recien bo a recupera di Covid-19, pa asina bo por drenta tur evento cultural y deportivo, manera Bar y Restaurantnan.
Pesey mes, e cantante Hana Horka a pone riba su social media e siguiente mensahe djis 2 dia prome cu el a fayece:
“Mi a sobrevivi! Pues awor si lo bay tin teatro, sauna, concierto, sauna, y un viahe urgente pa baña na lama/”
Riba tur esaki, e yiu homber di e cantante awor ta lamenta cu su mama a bira victima di mal-informacion riba e efectividad di e vacunanan contra Covid-19.
“Ta hacimi hopi tristo cu mi Mama a bay mas tras di stranheronan envez di su mesun famia. E no tabata djis mal-informacion total, sino tambe opinionnan riba e inmunidad natural, y e anticurpanan crea ora cu bo haya e malesa,” el a bisa.
Den luna di Januari, ta hopi personahe conoci cu tabata fuertemente contra vacuna, a haya Covid-19 y esey a dal nan duro te cu nan a wordo interna den Intensive Care, nan a wordo intuba, y ni asina no por a salba nan.
