Corupcion cu otorgamento tereno bou nanishi di experto legal
*Veredicto firme di Huez ta confirma negoshi ilegal AVP cu tereno
*Condena di Benny den luz di rekisito legal pa haya tereno gobierno
ORANJESTAD (AAN) — Esencia di e veredicto di Huez den e Caso Avestruz, tabata cu Benny Sevinger como Ministro den Gobiernonan Mike Eman, a permiti su mes wordo cumpra y a ricibi placa bou mesa.
Huez a yega na e conclusion legal cu Benny Sevinger como Ministro di AVP, a acepta placa bou mesa pa pone su firma pa terenonan wordo otorga.
Huez a yega na e conclusion final tambe, cu “friends” di AVP a haci nan mes culpabel den e scandal.
Pues por conclui cu durante gobernacion di AVP tabata tin negoshi cu tereno di Pueblo na momento cu Hulanda a drenta pa kita autonomia financiero di Aruba. Na momento cu Mike Eman tabata den welga di hamber, segun e veredicto di Huez, Benny Sevinger tabata entrega terenonan na “friends”.
Ley ta bisa cu e Prome Ministro no ta responsabel pa loke Ministronan haci. Parlamento si mester mira kico ta pasa den seno di gobernacion, pero e Parlamento cu mayoria di AVP, a keda silencioso.
E politico central den AVP na e momentonan, tabata mr. Mike Eman cu prome cu el a bira Prome Ministro tabata traha como Candidato Notario na Aruba y por a wordo encarga entre otro cu e parti legal di traspaso di tereno di Gobierno den cual notario ta hunga un papel central.
Esaki no ta implica cu Mike Eman tabata tin ni conocemento di loke Benny Sevinger a haci ni a wordo informa dor di votadornan cu nan a acerca Benny pa tereno.
Pero si el a nifica cu na momento cu e investigacion a cuminsa, Mike Eman como politico cu a cumpra confiansa di un grupo grandi di ciudadano, tabata tin un deber cu su votadornan.
E mester a mustra riba e delito grandi cu abuso cu tereno di Pueblo ta encera.
Mike Eman for di 1986 tabata activo como relacionista publico di su ruman cu tabata Prome Ministro di Aruba y como heredero politico di Aruba, tabata bon na haltura di loke politica di Aruba tabata encera.
El a traha di 1994 pa 2001 como Kandidaat Notaris na Aruba pa na 2001, bay ocupa su mes cu e trabou di lider di fraccion di AVP den Parlamento. Durante e tempo aki el a uza su conocemento como Notario den asuntonan comercial priva di clientenan manera e trabou di un Kandidaat Notaris ta exigi.
Benny Sevinger tabata tin un relacion amical intimo cu Mike Eman, despues cu AVP a atrae Benny Sevinger como sucesor di Watty Vos, kende a muri na Houston dia 6 januari 2001.
Watty Vos tabata un figura sumamente importante den mundo politico di Aruba, cu el a drenta como miembro di MEP cu el a bandona pa forma e partido RUBA, cu despues a uni na AVP.
Watty Vos, sinembargo, a mantene su propio grupo di simpatisador personal cu pa un gran parti a bira e herencia politico di Benny Sevinger den AVP.
Mike Eman mes a admiti su relacion inseparabel cu Benny Sevinger, cu el a exigi pa drenta Parlamento como acusado den e caso Avestruz.
Mike Eman y Benny Sevinger tabata e dos dirigentenan di realisacion di e rapport Bo Aruba, cu a dicidi pa e terenonan importante y cu lo a bira importante pa Aruba y asina conoce un balor mas halto, manera expertonan ta trece dilanti.
Segun Ley no por tene un Ministro Presidente responsabel pa loke a pasa durante gobernacion di su Gabinete pasobra cada Ministro tin su propio responsabilidad. Esaki pues ta haci cu Mike Eman no ta responsabel, ni pa e hecho cu su propio simpatisantenan politico, awe ta parti di un scandal cu a manda nan prison.
E punto central ta, cu Benny Sevinger pues si e kier tabata sigur cu e por otorga tereno manera el a haci, por a consulta cu Mike Eman como experto pero aparentemente no a haci esaki.
Expertonan ta indica confirma cu Ley mester wordo cambia y cu e Prome Ministro cu ta entrega su nomber na un Gabinete, mester wordo pone na haltura di personanan cu ta ricibi terenonan, ta wordo encarga cu proyectonan y tur loke por crea actonan di corupcion den su gabinete.
Den e caso aki ta evita cu un persona cu tabata Prome Ministro, ta bira un avestruz, cu no ta mira kico ta pasa ora e tabata busca su cuminda y su bista tabata dirigi na suela.
