Abogado mr. Vito Carlo:
ORANJESTAD(AAN): Diadomingo DIARIO a logra haya un entrevista cu abogado di ex parlamentario y ex minister Otmar Oduber, Mr. Vito Carlo, tocante e caso Flamingo cu ta un caso den cual Oduber ta wordo acusa di falsificacion, estafa, acepta soborno den su funcion como minister, haci maluso di su funcion como minister, forma parti di un organizacion criminal, labamento di placa y aumento inexplicable di fondonan priva.
Carlo a cuminza na bisa cu normalmente e no ta hopi inclina na duna un entrevista den un caso penal, pasobra e caso semper ta wordo bringa den corte. Sinembargo den e caso aki su cliente, kende tabata un figura publico, a dune e ok pa e haci e entrevista, sigur pa aclarea diferente malcomprondemento cu por tin den e caso.
Aspectonan cu a y ta afecta Oduber den su negoshi, famia etc. Pesey abogado Carlo a wordo pidi pa aclarea partinan legal di e caso.
Segun e abogado e caso a cuminza cu listramento di cas di Oduber na Juni di 2020, pero cu despues a bin resulta cu na 2019 tur cos a cuminza, ora cu Recherche Samenwerkingsteam (RST) a haya cierto tip.
Oduber na dado momento a haya un carta cu e lo bay wordo deteni y cu e ta bay wordo interoga.
E ex mandatario a pidi pa no perde mucho tempo pasobra e kier a aclarea tur cos.
E interogacion tabata tiki straño segun Carlo, pasobra di e 7 puntonan cu Ministerio Publico a presenta cune, a puntre solamente riba 3.
Despues di 2 dia por pidi pa prolonga e detencion di e sospechoso y den un procesverbal ta splica kico ta e sospechonan contra e persona, relata na e listramento di cas na 2020.
Entre otro cu Oduber lo tabata envolvi den negoshi di tereno di Gobierno y cu e lo tabata tin placa na China y Miami.
“Nos a haya straño cu den e prome interogacionnan no a puntra nada di e sospechonan di 2020 y nos a bisa huez esey tambe”.
Den e 8 dianan di interogacion cu a sigui no a puntra nada di e supuesto hechonan castigable relaciona cu Juni 2020, segun Carlo, kende a indica cu Fiscal a pidi pa prolonga detencion di Oduber y un Huez Comisario hopi critico di Corsow tabata di acuerdo cu OM a no a bin cu nada mas cu e tipnan cu nan lo a ricibi na 2019.
“Hecho ta cu nos a wordo scucha riba full algo otro y nada riba e supuesto negoshi di tereno, placa y organizacion criminal”.
Fiscal a bisa cu e tin mas cos y cu e lo bin cu nan despues y ami a puntra e ora ey con mi por defende mi cliente asina y e Huez Comisario a dunami razon door di cuestiona e Fiscal y laga Oduber bek den libertad, segun Carlo.
Fiscal no tabata contento y a apela e decision, entregando un dossier completo.
Ora cu e abogado a ricibi e dossier completo, e y su cliente compronde for di cua skina acusacionnan a sali.
“E interogacionnan tabata tin di haber puramente cu un denuncia cu Marisol Lopez Tromp a haci na Juli 2020, esta mas cu un luna despues di e listramento di cas”.
Ta trata di e supuesto ‘spook ambtenaren’, un contrato di social media y algun tereno di erfpacht cu lo tabata tin algo robez cu nan, segun Carlo, kende a indica cu tabata mustra cu OM na 2020 a purba tanto acusacion y no a haya nada y door cu nan no a haya nada nan a gara e denuncia di Lopez Tromp, pa e ora ey basa e caso Flamingo riba esaki.
“Tabata mustra manera un ‘fishing expedition’, pasobra ta pisca OM ta pisca pa purba haya algo”.
Oduber durante e interogacionnan a bari tur acusacion for di mesa y a haci un denuncia contra Lopez Tromp, mirando cu su denuncia no tabata cuadra, segun Carlo, kende a indica cu na dado momento Oduber a haya tur su placa bek.
El a splica cu despues Oduber a wordo yama atrobe pa wordo interoga y mirando e manera con e preguntanan tabata wordo haci, tabata hopi obvio cu OM tabata pisca.
Segun e abogado Landsrecherche a bay piki pieu riba mensaheronan bieu di WhatsApp.
“Nan tabata bay asina leu pa no duna tur informacion completo, pa pone un trampa pa mi cliente cay aden y e no a cay aden”.
Ora cu nan no a haya nada, nan a sigui busca pa purba haya un hecho castigable contra Oduber.
DIARIO a puntra e abogado si esaki no ta un indicacion cu OM ta bay mas leu posibel pa purba haya algo, pa no perde cara.
Carlo a bisa cu esey ta corecto, pasobra den e caso aki ta obvio.
Despues cu nan no a haya nada pa loke ta 2019 y nan no a haya nada via e denuncia di Lopez Tromp na 2020, OM a sigui bay pisca den cosnan bieu pa purba haya algo, segun e abogado.
“Mi ta kere cu esaki tin di haber cu e posicion di mi cliente kende tabata minister y parlamentario, unda cu nan kier ‘score’ door di por cera un ex mandatario, kende tabata tambe vice Prome Minister”.
Nan kier mustra cu politiconan na Aruba ta corupto, segun Carlo.
“E intencion ta pa conden'e pa algo, te hasta si ta trabao comunitario, pa demostra cu nan tin razon y no perde cara”, e abogado a sigui bisa.
