Candela feroz na Madiki a costa bida di un habitante femenino

Un señora di edad haya morto den Apartamento

• Señora a caba di baha cu pensioen 

ORANJESTAD (AAN): Un tragedia lamentable a keda registra Diadomingo marduga, ora cu alarma a ser bati tanto na Central di Polis, como tambe Centro di Alarma cu tin candela na Madiki.

   E prome yamada a drenta 1:26 am na Central di Polis, y inmediatamente a manda varios patruya di Playa rumbo pa e adres di Madiki 45, cu ta situa como 80 meter Zuid-Zuidoost di Anglo Kleuterschool.

   Diferente unidad di Bombero tambe a yega, hunto cu unidadnan di Polis cu mesora a cera e caminda.  Na nan yegada, ya caba vlamnan di candela tabata bay basta halto, y un e tabata manda un cayente inmenso.  Esaki a pone hopi bisiña lanta fo’i soño.

   E cas aki tin parti patras yen di cuarto di palo cu ta cubri espacio di 20 meter largo, y e candela tabata intenso.  Pesey e Comandante di Bombero a duna guia con pa ataca e candela di e mihor angulo pa asina evita cu e ta plama, y purba paga e vlamnan grandi na mesun momento.

   Bisiñanan a cuminza check rond pa wak kendenan a logra sali, y asina nan a bin sospecha cu lo por tin un señora ainda den su Apartamento.  Nan a check rond y no a mir’e pafo.  E informacion aki a wordo duna na Polis y tambe Bomberonan.

   Pero e enfoke tabata principalmente riba paga e candela, como cu tur e vlamnan aki ta imposibel pa penetra den e Apartamentonan.

   E combatimento di candela a bay bon, y Bomberonan di e forma ey a logra haya espacio pa asina cuminza controla paden.  Ora cu nan a bay paden, den baño di e apartamento a bin topa cu un curpa sin bida di un señora.

   Polis mesora a notifica Recherche di Playa, y pidi Team Forensico di BFTO yega, como tambe Bureau Slachtofferhulp. Docter Forensico tambe a yega.

   Asina el a constata morto di e señora Clomene Pierre, naci dia 6 di Juli 1960 na Haiti, pues e tin 65 aña di edad.  Apenas algun dia pasa el a baha cu pensioen, despues di a traha pa hopi aña den Housekeeping Department di Divi Resort.

  Cu agencia Funeraria, e restonan mortal a wordo hiba pa Mortuario, como cu Fiscal a duna ordo pa confisca e curpa.

  Recherche ta investigando si e candela ta algo accidental of no.

  Na famianan di e fayecida, tanto DIARIO, Cuerpo Policial, y Brandweer ta manda palabranan di condolencia na famianan.