Segun tradicion e fin di siman aki ta dedica na limpieza di cunuco
*Campo ta entrega e independencia economico mas grandi di un pais
*Awor Hulanda a duna Aruba e arma substancial di sobrevivencia
ORANJESTAD (AAN) — Dia 24 di Juni ta dilanti porta atrobe y Aruba ta prepara pa sostene su tradicion pa dera gay.
E pober gay ta wordo persigui pa e hecho cu San Juan Bautista mester paga pa pica di San Pedro, cu a nenga Hesus y a traiciona su maestro, tres bez prome cu e gay a canta.
Riba Dia di Juan Bautista pues, segun herencia cultural di Aruba, ta bay dera gay riba cunuconan cu a wordo prepara pa e temporada di horcan, cu lo produci yobida cu Aruba mester pa su parti economico mas antiguo, cu ta agricultura.
Industrializacion na tur pais na mundo, tabata tin impacto grandi riba e ramo economico principal, cu ta e sector di produccion di cuminda y awa potabel, cu hende mester pa sobrebibi.
Entrada di turismo a exigi mas produccion di cuminda manera sigur Daniel Leo como diputado tabata splica ora e mester a traha riba un ramo cu mundo moderno kier a lubida pa motibo di e hecho cu hende den e temporada di industrializacion y generacion di fondonan enorme, a bandona cunuco.
E ramo economico mas importante den sobrevivencia di hende, ironicamente dor di status social falso, a wordo combeti den trabou cu a wordo ignora pa loke ta trata su balor ya cu tur hende kier a bay sinta den oficina.
Ta den gueranan y catastrofenan cu a destrui produccion di cuminda, hende a cuminsa aprecia su cunuco como fuente directo di su alimentacion, di su bida.
Ya ta diez aña cu Nacionnan Uni a mara Gobiernonan, pues tambe Aruba, na e programa di sostenibilidad di comunidad, cu atrobe ta un nomber sumamente caro y importante.
Loke e ta nifica na idioma normal, ta cu hende tin e tarea na bolbe na antes, tempo cu hende prome nan casa tabata construi nan cas; tabata traha tanki y dam y coba poz pa tin awa y tabata bay produci nan cuminda den nan cunuco.
Cunuco tabata un parti importante di e Arubiano, cu tabata orguyoso ora e mester splica unda su cunuco ta situa.
E cunuco tabata produci cuminda den un naturaleza cu ta sufri di secura grandi y mester di reservanan di awa cu na Aruba tabata e tankinan.
Juni ta coincidi cu e temporada chikito di yobida, mara na e temporada di sistemanan di horcan cu ta trece awa pa Aruba.
Fiesta di San Juan Bautista na inicio di Juni, na inicio di e temporada di yobida, a habri caminda pa limpieza di cunuco cu su candelanan grandi.
Eror semper ta humano y San Juan Bautista a bira pues popular den e fiesta pa castiga e gay cu a canta ora Pedro a traiciona Hesus.
Ariba e terenonan limpi despues cu un anochi prome a kima tur sushi, tabata bay dera gay den cunuconan caminda lo a cria gay, produci cuminda pa Aruba come.
Na 2025, mundo mester bolbe cunuco den un situacion mundial cu ta deshaci di tur e luho cu guera mundial y industrializacion a laga atras, pa asina produci su cuminda den campo.
Na 2025 Hulanda ta splica Aruba, cu e tesoro cu Reino lo duna Aruba como asistencia ta pa Aruba bolbe campo y produci su pan di cada cu sudor di su frenta den calor, cu ta atrae turista cu tambe ta considera “pan bati cu maishi rabo”parti di e industria turistico cultural.
Na inicio di temporada di horcan, cu mester percura pa awa, Aruba ta entrega prueba di inteligencia di su habitantenan cu den un suelo cu realmente no ta na fabor di agricultura, tabata y ta planta su pan di cada dia.
Na 2025 Aruba mester bolbe campo, cu industrializacion a trata na desprestigia, pero cu awe ta bira e forma pa Arubianonan habri caminda na un momento cu importacion di alimento ta na peliger.
Tempo ta e mihor maestro pero tambe ta scoge su maestronan den comunidad. Awe Aruba tin dam pa warda awa, despues cu Hulanda cu mester di placa pa e mes sobrevivi den un mundo sin rumbo fiho, ta duna solamente asistencia pa Aruba planta su pan di cada dia.
San Juan ta bati na porta di Aruba, cu hunto cu mundo ta realiza su eror di a menosprecia campo y agricultura, productor di su cuminda hunto cu pesca. Awe henter mundo ta bolbe campo, bolbe naturaleza ultraha pa hende, cu ta nace cu e mal costumber di desprecia loke mester aprecia y asina mescos cu Adam y Eva ta perde paraiso, cu mester recobra.
