Joni Musabayana, director di 'International Labour Organization'
ORANJESTAD (AAN): Den un entrevista cu DIARIO, Joni Musabayana, director di International Labour Organization, a elabora riba su bishita na Aruba, cu ta un mision oficial pa delegacionnan di Aruba conoce tur e actornan clave den e mercado laboral. El a splica cu nan ta reuniendo cu Gobierno pa medio di Ministerio di Labor y Turismo. "Nos ta topa cu e gremionan comercial, y nos ta topa cu e doñonan di trabao tambe. Y esaki ta pa realmente haya un bista na unda e mercado laboral na Aruba ta para. Como un pais constituyente di Reino Hulandes, nos ta miembro di ILO".
Musabayana a splica cu como miembro di ILO, bo ta ratifica 32 convenio, cu ta tratadonan internacional riba con bo kier maneha e hendenan na trabou. "Realmente nos ta aki pa wak con esey ta bayendo, ki sosten nos por brinda Aruba pa asina boso por tin un mercado laboral cu ta fit e economia di Aruba, cu pa gran parti ta wordo impulsa door di turismo".
Segun Musabayana, un reto grandi den futuro ta e cambionan di laboral impulsa pa dos asunto. Prome ta e cambionan demografico. Di un banda, nos tin un poblacion cu ta enbiehece y di otro banda, hobennan cu ta wordo afecta, den gran parti, pa desempleo.
Migracion laboral tambe ta un tema cu nan a trece dilanti, pa motibo di e scarcedad di trahado den e pais. Y con nos ta percura pa e pueblo local di Aruba tin acceso na e mercado laboral? Di un banda, Gobierno ta capaz, na un manera responsabel, pa trece e trahado cu ta necesario pa cumpli cu e scarcedad cu tin den cierto sector. E ta kere cu esaki ta e reto grandi cu e mercado laboral na Aruba ta enfrentando.
Musabayana a indica cu nan a reuni cu Minister y e ta contento di bisa cu tabatin un delegacion tripartite di Aruba na e conferencia laboral internacional siman pasa y e siman prome na Ginebra, unda nan tabata discuti e retonan di mercado laboral di e mercado laboral mundial. Y tabata contento cu Aruba, y enberdad hopi otro pais di region di Caribe, a forma parti di e dialogo aki. "Nos ta spera awor cu e mision aki nos lo enfoca realmente riba ki sosten nos por brinda na boso prome pa actualisa e legislacion den e mercado laboral en general".
Particularmente pa brinda sosten pa atende cu e reto di scarcedad laboral y e migracion laboral, probablemente mirando kico ta e trayectonan pa regularisa e forsa laboral ta existi, cu ta indocumenta, y iregular, pero tambe pa wak kico tabatin den e economia informal y kico por haci tambe pa formalisa esnan cu ta den e economia informal, y realmente pa mira con nan por asisti pa mehora productividad, pa Aruba por sigui ta competitivo. Nan lo ofrece sosten tecnico, legislativo, pero tambe capacitacion, y nan ta spera, cambionan legislativo.
{gallery}Aruba tin dos reto grandi den mercado laboral, enbiehecimento di poblacion y desempleo entre hobennan{/gallery}
