Candela di mondi na Bushiri a spanta habitantenan

ORANJESTAD (AAN): Tabata Diamars merdia alrededor di 12:10 pm, cu alarma a worde bati cu net patras di algun cas den Caya Soeur Nicephora na Bushiri, tin un candela cu ta desaroyando.

   Tanto Polis como tambe un Spuitwagen di Cuerpo di Bombero a yega na e lugar, cu ta net patras di e lugar unda antes tabata Aruba Sailcart.  Aki tin monton di yerba seco y articulo bieu plama riba e tereno, y nan tabata na candela.  E tereno aki ta di como 5 mil meter cuadra.  E candela a produci huma diki cu tabata visible di varios kilometer leu.

   E candela a sigui expande, y dado momento a cuminza kima e yerbanan cu tin meymey di cas #4 y cas #8 den Caya Soeur Nicephora.  Yerbanan seco a pone cu e candela a kima tur vegetacion riba e tereno di como 730 m2 cu tin mey-mey di e dos casnan.  Candela a paga ora el a yega na e acera.

    Ta basta cas tin construi den e area di “Cayanan di Soeur”, pero ta tristo si pa e distancia ta leu te asina leu ta un solo Hydrant tin instala pa Bomberonan haci uso di dje cual ta keda na distancia leu si acaso situacion sali for di man por haci uso di esaki.