Cancha di Centro Deportivo Betico Croes ta completamente nobo

ORANJESTAD (AAN): Despues di basta aña, e cancha cu tabata existi desde tempo di Sporthall na Santa Cruz,

y cu despues a cambia nomber pa Centro Deportivo Betico Croes a sigui deteriora.  Aunke tabata keda us’e toch pa diferente disciplina di deporte, el a haya hopi mas buraco den dje ora cu e.o. a haci uso di dje como lugar pa Vacuna, y cu a pone monton di stoel riba dje.

   Pesey na luna di Juli 2024, a cuminza cu e proyecto pa kita e piso di e cancha completamente, y pone uno nobo.  E contratista encarga cu e trabao aki tabata Arubaanse Wegenbouw Maatschappij cu a haci un trabao meticulosamente delicado, y a sa di sobresali den esaki.

   E proyecto tabata extenso, pa ranca esun existente y asina bay nivela cualkier discrepancia cu tabatin den e fundeshi final mas ariba.  Despues a sigui cu proceso pa haci e piso mas ariba fini, pa na final por pone e ‘coat’ diki cu ta e cancha mes.

   Un bon trabao, y e speranza ta cu tur dirigente deportivo, coach, y atleta lo bay cuida e cancha aki pa asina por tin hopi decada di uso di dje cu resultado satisfactorio.