Campeon Mundial di Kickboxing cu no kier a acepta vacuna a muri awor door di Covid-19

E no kier admiti cu el a haya Coronavirus --- BRUSELAS: E atleta di Belgica, Frederic Sinistra, kende a sali tres biaha Campeon Mundial di Kickboxing, a perde su bida debi na Covid-19. 

El a nenga pa acepta cu e tin Coronavirus den su curpa, y e mes a sali di Hospital.  El a fayece na su cas na Ciney, Belgica.

   Conoci tambe como e “Homber mas fuerte di Belgica”, Frederic di 41 aña di edad a wordo contagia y e sintomanan a dal e masha duro mes.  Dado momento den luna di November el a bira asina grave, cu su coach a bise pa e bay busca yudanza medico.  Asina el a bay cu urgencia y hospitaliza.  A haci test cune, y a bin sali na cla cu e tin Covid-19, y mesora el a cuminza ricibi diferente remedi y tratamento adecuado pa e por recupera.  Pero ni asina e no a cambia su actitud contra vacunanan, y mas bien tabata hari y bisa cu Covid-19 “no ta existi”, y cu e no tin e malesa ey.  Esey ta tipico di hendenan cu ta kere storianan inventa riba Internet.

   El a hasta pone potret di su mes riba Social Media, unda bo ta mire poni cu aparatonan di ventilador den Intensive Care.

   Frederic conoci tambe como ‘The Undertaker’ den comunidad di Kickboxing, tabatin semper un postura contra vacuna pasobra su teoria ta cu hendenan no sa kico tin den vacuna.  Pero awor den Hospital, tampoco e no sa kico tin den tur e remedinan cu nan a dune pa purba salba su bida.

   Despues di esey, e no tabata sa mas kico pa bisa y con pa enfrenta su fanaticonan, y el a dicidi cu e ta bandona Hospital na fin di November.  El a haci esey contra deseo di specialistanan.  Pero si e kier sali, el a wordo poni pa firma un carta unda e ta declara cu e mes ta sali di Hospital riba su propio riesgo.

   El a bisa cu e ta bay trata e “virus chikito” su mes na cas, y pesey ta bandona Hospital.  Ni maske kico su amigonan a bise, parce cu su nivel di inteligencia ta basta pober y na final nan a djis para na banda y mire bay cas ainda basta malo.

   Awor el a sucumbi di e virus, despues di sufri mas complicacion di e malesa.

   Frederic ta un persona cu tabata lanza critica mahos contra Gobierno di Belgica, ora cu nan ta bin cu restriccion pa trata na mitiga e brote di Coronavirus na e pais Europeo.

   Dia 26 di November mes el a anuncia cu e pelea planea pa 4 di December a wordo cancela, y aki el a lanza su furia y bisa cu e ta tur ‘disgusta’ pa a wordo obliga na cancela e evento.

  “Un guerero nunca ta rindi su mes, y mi lo bin bek aun mas fuerte,” el a skirbi riba Social Media.

   Despues el a skirbi: “Mi a nace prematuro y mi lo sigui luchando te na morto manera un homber sin cu nunca mi ta rindi mi mes y muri sin remordimento.”

   Tres dia prome cu su morto, ainda Frederic tabata reacciona riba comentario di fanaticonan riba su Facebook.  “Danki na boso tur pa boso sosten.  Mi ta na cas ta recuperando como debe ser,” el a skirbi.  “Mi lo bin bek mil biaha mas fuerte’.

   Su casa despues a anuncia cu Frederic a fayece.

   Awor cu tributo: Frederic Sinistra a gana titulonan Mundial y Europeo durante henter su carera, y a hasta bay cu titulo nacional di Belgica na 2004.  E tin un record di 39-9 den su carera profesional, y un biaha a yega di wordo yama ‘Homber mas fuerte di Belgica”.  Su ex-coach Fabian Pavone ta entre esnan cu a comenta cu Frederic tabata un “forza di naturaleza cu un curazon di oro”.  Su amigo Jordan Sferrazza a bisa: “E tabata un homber di oro.  Mi lo no lubid’e nunca.  E tabata esun mas fuerte na Belgica den e categoria di peso pisa”.

   Gobierno di Belgica a impone medidanan nobo desde Dia di Pasco 25 di December cu a cera lugarnan cultural manera Sala di Concierto y Cinema pa cera.  Algun negoshi a protesta y varios mil hende a demostra Diadomingo na Bruselas contra e decision.