Campeon Mundial di Arte di Sucu Florence Lesage a duna 'masterclass y afternoon tea' na Aruba Marriott Resort

ORANJESTAD (AAN):  Durante un weekend cu a cuminsa for di Diahuebs, Florence Lesage, Campeon Mundial di Arte di Sucu, 2022,

a presenta y comparti algun di su specialidadnan y tecnicanan di ‘pastry’ cu nos hobennan di E.P.I, pa asina aporta na e comunidad local y e futuro di e hobennan cu ta asisti e estudio culinario y den pasteleria.

            Florence Lesage a cuminsa cu su carera cu apenas 15 aña di edad, hayando e inspiracion di ‘pastry’ hopi trempan for di su wela. Florence despues di su estudio secundario a obtene su pre-bachelor degree continuando cu su ‘Bachelor’s degree in Culinary’, specialisando den pastry. Durante e estudio aki ta unda a adkiri e conocimento basico y tambe experencia den labor ora cu a traha como stagiair. Ora a ricibi su ‘degree’, Florence a solicita pa ‘Brevet Technique des Métiers Pátissier’, cu tabata un stage di 2 aña, adkeriendo ainda mas sabiduria den e area di pasteleria. Despues di algun aña, Florence a ricibi su ‘Brevet de Maîtrise’, su ‘Master’s degree in Pastry’.

            Na aña 2015, Florence a participa den varios competencia, incluyendo ‘WorldSkills’ na Sao Paulo, Brasil, caminda el a gana e titulo di ‘Vice World Champion Junior’. Segun e aña nan a avansa, Florence su pasion y dedicacion tambe a crese y asina na 2022, den colaboracion cu Alexis Beaufils, pastry chef di Francia, nan a logra saca e titulo absoluto di ‘Mondial Des Arts Sucres’, 2022, e campeonnan mundial di e arte di sucu.

            Den e weekend ultimo, Florence a haya e oportunidad di presenta su ‘pastry’ nan unico na e comunidad di Aruba, kende tabata tin e oportunidad pa reserva e experencia di ‘Afternoon Tea’ na The Lobby, situa na Aruba Marriott Resort. Por bisa si, cu den 48 ora ja e evento tabata ‘sold out’. E team completo di Aruba Marriott ta gradici e comunidad di Aruba pa un reaccion tremendo y ta contento di por a colabora cu un pastry chef renombra mundialmente. E compleho di Aruba Marriott ta kere den e avanse di nos comunidad y den trece experencianan unico y inolvidabel na Aruba.