Dia 4 di December Centro di Bario y Deporte Dakota a cumpli 47 aña di existencia:
ORANJESTAD (AAN) – Den conferencia di prensa, e presidente di Centro di Bario y Deporte Dakota, Carl Michael Bikker, a trece dilanti cu e Centro a cumpli 47 aña di existencia, Dialuna ultimo 4 di December.
Bikker a bisa cu dia 7 awo, e directiva nobo di Centro di Bario y Deporte Dakota ta haci tres luna di a wordo elegi, y tin como plan reconstrui e Centro.
“Y nos kier para keto pa recorda nos bario cu Dialuna 4 di December a cumpli 47 aña cu e Centro a wordo inaugura. 47 aña cu nos tin un club den nos bario, un soño di hungadornan di futbol cu a inicia na aña 1947 pa tin nan propio Clubhuis, pero a lo largo di e carera, despues di hopi dificultad un grupo di persona a haya oportunidad di combersa cu Hulanda, y eynan un persona a carga henter e liderazgo, ken ta señor Frans D. Adonis, kende despues a forma un team cu mas persona y asina a construi e Centro di Bario y Deporte Dakota, cu ta un di esnan di mas grandi riba nos Isla, y den Caribe un di esnan di mas bunita den arkitectura.
Pesey ta bon pa recorda riba e fecha 4 di December, y e hecho cu ta 47 aña caba cu e construccion di Centro di Bario y Deporte Dakota a inicia, y cu awo henter e bario por haci uso di dje. Como tal, ta inicia un campaña den e bario cu ta nifica cu e fanaticonan di Dakota y cada habitante aporta un florin, pa por sigui reconstrui e Club. “Esey kiermen, cu durante e dianan 16 y 17 di December aki, ta bay tin barinan y lo tin un team di boluntario cu e dianan ey lo ta cu e barinan, y ta keda na cada ciudadano pa aporta un florin pa yuda nos sigui reconstrui, mehora y yega na e deseo di henter e bario aki, pa zorg pa tin un facilidad bunita, accesible y sigur pa henter e bario y e comunidad Arubano, cu ta haci uso di e facilidadnan di Centro di Bario y Deporte Dakota”, Carl-Michael Bikker, Presidente di CBD a conclui.
