Campaña “Mira Nos” tin como meta pa hende muher haci nan chekeo propio

Stichting ABO cu enfoke riba cancer di pecho

ORANJESTAD (AAN)— Fundacion Mira Nos a yama un conferencia di prensa pa anuncia campaña “Mira Nos”, na HOH Academy, den cuadro di e luna di concientizacion di cancer di pecho, y Dia Internacional di Cancer di Pecho, cu lo wordo celebra dia 19 di October awo.

Gilliany Oduber, Nanine Parson, Charlaine Huntington a hiba palabra. Gilliany Oduber a cuminza pa splica cu e conferencia di prensa aki ta inicio di un campaña di concientizacion tocante salud y cancer di pecho. Gilliany a comenta tocante su experiencia personal cu “cancer di pecho”.

“Aña pasa na October 2024, mi a wordo diagnostica cu cancer di pecho y na e momento cu esaki a sosode, mesora mi a sinti cu esaki a pasa pa un motibo, cu por tin un proposito su tras y pa e motibo ey nos ta aki awe.

“E Campaña Mira Nos ta eigenlijk un yamada directamente di bo pechonan, pa bo mira nan, pa bo mishi cu nan, pa bo ta pendiente di nan, eigenlijk pa bo tuma responsabilidad di bo mesun pechonan. E campaña Mira Nos, lo sali for di Fundacion ABO. El a wordo adopta pa e Fundacion ABO, pero nos tin partnership cu diferente partner”, señora Oduber a menciona.

El a agrega cu berdad ta cu hopi biaha ora cu algo pasa bo y e ta negativo, esey semper ta sali den noticia, y ta historianan cu semper ta wordo comparti. “Y den e caso aki, mi ta sinti cu ta mi deber cu ora un cos ta cana nechi, bunita, tambe ta importante pa conta bo historia. Si, mi a wordo diagnostica cu cancer di pecho aña pasa, y si e tabata un proceso hopi dificil, hopi duro sin duda, Pero e ta duna mi hopi satisfaccion eigenlijk y mi ta hopi contento di sa cu nos tin un proceso solido na Aruba”, Gilliany Oduber a relata.

El a agrega cu for di momento cu e mes a haci un chekeo propio p’asina haya sa cu e tabata tin e cancer, mesora e proceso a cuminza y el a haci e mammogram cu Echo. Ora cu el a haci esaki, den 24 ora ya Mama Poli a yam’e.

“Es decir, e proceso a cuminza cana mesora cu hopi speed, y ta un orguyo inmenso pa sa cu na Aruba nos tin hospital cu tin e proceso di Chemotherapy, y alavez a opera mi. Nos tin ImSan cu no solamente ta haci operacion y alavez tambe duna mi e servicio di bestraling. Nos tin fundacionnan manera Mary Joan y tambe Fundacion Wilhelmina Kanker Fonds, cu ta duna sosten na e pashentnan, nos tin DVG cu ta para tras di e campaña aki.

Definitivamente, nos a haya hopi sosten y cu e campaña nos kier logra algo bunita, nos kier inspira esnan bao di 45 aña pa haci nan chekeo propio. Adicionalmente nos kier bay lanza un challenge cu yama ‘feel your titties challenge’ cu ta pidi directamente pa bo mishi cu bo pechonan. E challenge aki lo wordo carga door di WoW Aruba (Women empOwering Women). Nan lo ta organizando e challenge.