Ivo Valdes:
ORANJESTAD (AAN): Aruba ta den su di 14 campaña electoral y e politiconan bisti cu nan mascarada ta organiza diferente reunion y fiesta pa gana e confianza di e pueblo votado. Esey ta loke e ciudadano Ivo Valdes a declara.
Pueblo, den su soño inocente, ta participa activamente na e actividadnan aki, pensando cu e biaha aki si, cos ta bay bira miho. E ciudadano un bes mas kier tende kico e futuro gobernante ta bisa y kico e ta bay haci. Atrobe, ora nan ta den gobierno ta bay baha prijs di awa, coriente, gasolin y ta subi e pensioen di e pensionadonan. Un bes mas e pueblo ta tende cu e bienestar lo ta pa un y tur.
E ciudadano soñando cu un cambio, inocentemente ta kere cu e biaha aki si e politiconan lo haci loke nan a priminti. Pero, e realidad ta otro.
Loke e politiconan kiermen ta cu e bienestar cu nan ta predica ta pa nan mes, nan famia y nan amigonan, no pa e pueblo.
E pueblo a kere cu e politico t’ey pa sirbie cu principio, honor, integridad y transparencia. Pero, despues di eleccion e mascaradanan ta cay y e fiesta di mascarada ta termina. Awo e gobernante tin e poder y e placa, cu ta e armanan cu e mester y cu politica a siñ’e uza contra e pueblo.
Despues di eleccion e politiconan eligi ta mustra nan berdadero cara y e fiesta real ta mira luz di dia y e pueblo no ta invita!
E pueblo cu su memoria selectivo e pueblo no ta corda tur loke e politico a priminti di haci.
E gobernantenan ta saca nan agenda politico pa bolbe sigui cu e fiesta di gasta placa di pueblo por sigui tuma luga. Mientras cu e gobernantenan ta di fiesta, e pueblo engaña, cu tristeza y hamber tin di sigui paga mas belasting pa fiesta por continua. Nos gobernantenan, contento pasobra un bes mas nan a logra nan proposito. Nan a logra bin na poder cu engaño y promesa falso!
E pueblo votado ta bolbe sinti su mes engaña, decepciona e ta fula su cartera cu cada dia ta bira mas fini y bashi. Pero, e no ta realisa cu pa su inocencia, e debe riba su cabes cada dia ta bira grandi y mas grandi!
