Partidonan reformador Hulanda cu forma di liderazgo di Betico
*RAft ta e prueba grandi di impacto eleccion Hulandes pa Aruba
*Reunion cifranan real 2023 Gobierno di Aruba awe di importancia
ORANJESTAD(AAN)—September 2023 a haya su inicio. Un September cu lo marca historia di Parlamentonan den Reino Hulandes na forma directo of indirecto.
Manera DIARIO ya pa basta dia ta adverti Aruba, Reino Hulandes a drenta un periodo di transicion pa un futuro maneho gubernamental, cu na prome lugar lo ta dirigi riba e bienestar directo di Hulanda y e bon ehecucion di Statuut.
Tanto Statuut, cu ta e base legal di relacionnan entre paisnan den Reino, como Constitucion di Reino, ta mishi directamente cu e Arubiano.
Na 2023 Pueblo di Hulanda ta bay urna electoral na momento cu e desaroyonan enfrente RAft ta entrega prueba na Aruba con importante e politiconan na Hulanda ta pa Aruba, cu mester entrega prueba cu e ta fuerte den su zapato pa carga su responsabilidad.
Dos partido Hulandes na e momentonan aki, por wordo considera e reformadornan politico di Hulanda, caminda awe e prome informacionnan di DIARIO riba e cambionan politico y gubernamental grandi na Hulanda, ta wordo confirma.
Caroline van der Plas di BoerBurgerBeweging y Pieter Omzigt di e partido Nieuw Sociaal Contract, ta e dos politiconan cu segun tur pronostico, lo tin influencia enorme riba gobernacion di Hulanda y asina di Reino Hulandes.
Nan politica no ta basa riba loke a bira costumber politico, pero hustamente loke mester tabata costumber politico, cu ta pone e bienestar di tur ciudadano y loke nan ta kere ta e bienestar di e pais na e prome lugar.
Tanto Caroline van der Plas como Pieter Omzigt, e dos dirigentenan di partidonan politico cu ta haci furor actualmente na Hulanda, a splica con nan lo vigila hasta nan partido si nan gana eleccion.
Pa Aruba comprende e dos politiconan Hulandes, Aruba mester bolbe na e politico cu a entrega Aruba e Status Aparte di Aruba, cu tabata Betico Croes, kende a nenga funcionnan como Ministro Presidente of Ministro y a entrega Aruba tur logro for di su asiento den Parlamento.
E formula di Betico Croes ta e formula cu tanto Omzigt como van der Plas lo sigui, manera nan a mustra ora nan a bisa cu nan lo no bira Ministro pero ta apunta hende di nan confiansa si nan mester eligi un Ministro Presidente.
Diabierna ya van der Plas a presenta na e votador Hulandes e persona cu lo ta Ministro Presidente di Hulanda si van der Plas gana eleccion, cu ta Mona Keijzer, kende a ocupa puestonan gubernamental importante na Hulanda.
Omzigt a indica, cu e ta preparando su candidatonan cu entre otro lo inclui su candidato pa Prome Ministro Hulandes.
September ta splica kico ta gobernacion di Pueblo ora tanto na Aruba como na Hulanda, Gobierno ta papia di e placa cu e ta maneha di Pueblo representa pa Parlamento cu otro siman ta scoge un Presidente pa 2023-2024.
Gobernantenan mester tene nan mes na e plannan cu nan ta entrega na Parlamento y cu den e programanan di Gobierno ta wordo acorda a base di loke den eleccion Gobernantenan a priminti Pueblo.
Ta den e cuadro aki Diamars 12 di September, Gobierno di Aruba, y Gobierno di Hulanda dia 19 di September, lo entrega nan Parlamentonan, nan plannan pa e proximo aña y e forma cu nan ta gasta placa di Pueblo.
Mientrastanto ya awe, Parlamento di Aruba lo wordo informa con Gobierno di Aruba a gasta e placa cu a wordo otorga pa gobernacion di Aruba den presupuesto di 2023 te awor y kico ta e cambionan cu mester wordo haci den e cifranan nobo.
E loke a habri caminda pa awe Aruba mester lucha contra RAft, ta wordo elimina cu e hecho cu Gobierno Wever-Croes awe por bisa Parlamento detayadamente kico el a haci cu placa di 2023 y kico e kier cambia den e cifranan, cu e por discuti cu Pueblo.
September ta habri pa Aruba y henter Reino momentonan sumamente importante den transicion gubernamental, cu un Constitucion cu ta exigi pa tur pais den Reino sirbi Pueblo.
Cu bon gobernacion den Reino no conoce diferencia di exigencia, ta keda presenta pa e realidad, cu na e momentonan aki cu reforma politico grandi mester tuma lugar na Reino, Van der Plas y Omzigt, ta dicidi cu nan lo haci manera Betico Croes a haci, cu ta dirigi gobernacion for di Parlamento, e Voz directo di Pueblo, den cual no mester tin lugar pa hende condena na prison!
