Informacionnan di DIARIO confirma den publicacionnan Hulandes
Partido di Van Huffelen ta ehemplar pa e exodo politico Hulandes
ORANJESTAD(AAN)—E intentonan pa finalmente yega na un Gobierno Hulandes nobo ta continua. Mas y mas ta bini dilanti, cu e elementonan cu DIARIO a presenta na 2023 pa splica Aruba e motibo di posicion Hulandes, ta wordo confirma.
No por deshaci di e realidad di 2023, ora politiconan Hulandes na mando, a uza black mail politico pa trata na forsa Gobierno di Aruba, pa acepta Supervision Financiero di Hulanda contra tur regla hancra den Statuut y reglanan pa gobernacion.
DIARIO cu prueba a mustra Aruba, con e tremendo logronan di Aruba den Reino pa medio di e maneho cu Gobierno di Aruba a tuma, a habri porta pa solucionnan cu International Monetary Fund ta mira den futuro di Aruba.
DIARIO for di momento cu Alexandra van Huffelen a cuminsa exigi Aruba inhustamente pa acepta e castigo di perde supervision, a mustra Aruba cu mester tene consideracion cu e hecho, cu cambionan politico grandi a bati na porta di Hulanda, caminda Pueblo ta exigi su politiconan cambio e maneho cu Gobierno Mark Rutte a hiba.
Awe den publicacionnan Hulandes ta bini dilanti con cambionan historico ta tuma lugar den mundo politico Hulandes, cu ta mira con politico tras politico cu tabata parti di e partidonan cu ta forma e Gobierno saliente, diripiente ta retira.
Sigur e partido D’66 di Alexandra van Huffelen ta no solamente un perdedor grandi di eleccion pero mester cuminsa puntra su mes kico haci cu su futuro.
Den medionan di comunicacion na Hulanda, inicio di 2024 ta oportunidad pa cuestiona e hecho cu e ministro demisionario Ernst Kuipers, di e partido di Alexandra van Huffelen, a dicidi cu imediatamente e ta bandona politica.
E ta uno di e politiconan cu ta bay ocupa puestonan pafor di Hulanda.
Ni medionan di comunicacion Hulandes mes no tin tur informacion di e puesto cu e ta bay ocupa.
Segun e miembro di partido di Alexandra van Huffelen, e mester retira awor pasobra e funcion cu e ta bay ocupa den exterior, ta mara na un fecha.
Pues Rey Willem Alexander mester a acepta retiro di otro politico conoci na Hulanda caminda medionan Hulandes ta puntra nan mes, kico a pasa cu tanto politico Hulandes di Gabinete Mark Rutte, a despedi prome cu un Gobierno nobo a sinta.
Sumamente interesante ta, cu Kuipers a base di su trabounan tempo di crisis di e coronavirus Covid-19, a haya popularidad den Cuido Medico como informante di e situacoion Hulandes.
E no tabata miembro di D’66, e partido di Van Huffelen, pero a bira Miembro di e Partido, pa e por a bira Ministro. Pues un poco diferente na loke na Aruba ta costumber pa hende bira Ministro pa un partido.
Importante ta keda cu e ta otro miembro di e mundo politico activo actualmente na Hulanda cu ta bay prome cu un Gobierno nobo sinta despues cu Pueblo Hulandes a rechaza e gobierno Hulandes cu contra regla, a uza un sistema contra tur regla pa trata na blackmail Aruba pa acepta supervision di Reino mientras Aruba por a splica Reino con mester goberna!
