Minister Geoffrey Wever ta anuncia:
*Ta spera cu pronto ley lo por yega Parlamento
ORANJESTAD (AAN): Minister Geoffrey Wever a duna di conoce den entrevista cu tabata tin retonan grandi pa loke ta 'Huurcommissie' cu e manera di funciona ya cu e comision no por tabata sinta hunto pa entre otro motibonan di salud di algun miembro.
E ora a dicidi cu mester di un 'Huurcommissie' nobo. A haci un 'openbare werving' y asina e mandatario a anuncia cu tin un 'Huurcommissie' nobo hopi cualifica y cu personanan di hopi experiencia, huridico y practico, cu e peso y autoridad pa lidera e comision importante aki, a indica.
Den transcurso di otro siman lo presenta e comision oficialmente na publico. Banda di esaki a prepara un cambio di ley pa haci 'Huurcommissie' mas eficiente cu mas posibilidad pa modernisa. E concepto di ley a wordo aproba caba y aworaki ta canando su caminda pa bay Raad van Advies.
Minister Wever a indica cu esaki ta un desaroyo hopi positivo y e ta kere cu den e prome lunanan di e aña aki lo bay Parlamento bek pa wordo trata.
A busca tambe asistencia externo pa yuda atende e retrasonan cu tabata tin den 'Huurcommissie', yuda cu e preparacion di e 'beschikkingnan' y tambe a busca asistencia pa yuda cu e descripcion di e procesonan y e modernisacion mes di e organisacion ya cu esey no tabata bon structura, a bisa.
Aworaki ta bezig cu esey y a haci tur e trabaonan na final di 2023. Den e prome kwartaal di 2024 tur cos ta bay wordo finalisa pa asina por mustra con 'Huurcommissie' por bira un organisacion hopi mas moderno, eficiente y duna resultado directo na e huurdo y propietario'.
