Recordatorio: --- ORANJSTAD (AAN): Departamento di Asunto Social kier recorda tur cliente di bijstand cu ta cobra na MFA Noord cu pa e siguiente lunanan e cambio den localidad ta continua.
Manera ta conoci MFA Noord ta den un fase di mantencion y ta cera pa publico. Esaki a conduci na un cambio di localidad pa loke ta trata pago di bijstand di luna di mei cual fecha di pago ta diasabra awo 7 di mei 2022.
E localidad temporario ta bira oficina di Departamento di Asunto Social situa na Tanki Leendert. DAS su oficina na Tanki Leendert ta situa na Tanki Leendert 275-A y ta keda riba e caminda principal di Tanki Leendert dilanti e scol Mi Pret’I Wowo.
Te ki luna e cambio aki ta keda na vigor DAS no por bisa pero si cu e ta uno temporario te ora cu MFA Noord habri bek pa publico. Pues un suplica ta bay na tur cliente di bijstand cu tur luna normalmente ta cobra bijstand na MFA Noord pa tene bon cuenta cu e cambio temporal aki pa asina evita cualkier inconveniencia.
E cambio aki ta solamente pa clientenan cu ta cobra na MFA Noord, pago na e otro localidadnan ta continua normal.
