Dia 22 di augustus 2023 tormenta tropical Franklin a adverti
*Philippe tabata e depresion cu lo no tabata tin bida largo
*Zona di Convergencia Intertropical y algo mas na October
ORANJESTAD(AAN)—Pa comprende kico a pasa Diamars dia 3 di October 2023 na Aruba, mester bolbe na e ultimo siman di September 2023.
National Hurricane Center ta e autoridad riba tereno di horcan pa e region di Oceano Atlantico, Caribe y Golfo di Mexico.
Tur desaroyo di sistemanan cu ta baha for di e costa Africano, ta nace den Oceano Atlantico of den Caribe, of for di Oceano Pacifico por bira menasa pa e region Caribense, ta wordo sigui di acerca pa National Hurricane Center, cu ta traha cu informacionnan constante cu ta drenta di tur Servicio Meteorologico den e region y su propio produccion.
El a vigila un sistema cu no tabata parce di mucho importancia pa e region di Caribe.
Dia 27 di September, e informenan di National Hurricane Center tabata papia di e tormenta tropical Philippe, cu lo a drenta region di Caribe pero lo a baha den intensidad y bira un depresion pa motibo di e condicionnan atmosferico di e momento.
E cadena di islanan na entrada Atlantico di Caribe, cu normalmente ta bati alarma for di tempran, no tabata tin motibo pa haci esaki pasobra tur indicacion tabata cu Philippe lo no tabata tin bida largo.
Na momento cu e lo a drenta region di Caribe, e lo a baha di intensidad y bira un depresion tropical cu lo no a yega mucho leo na e entrada na parti Noord di Caribe.
DIARIO a cumpli cu su labornan pa un motibo masha simpel.
Un sistema tropical ta un fenomeno di naturalesa, cu ta lucha pa sobrevivencia.
Philippe a permiti region di Caribe keda trankil y a dicidi pa su mes.
Si e mester a drenta na e parti Noord di Caribe, el a cuminsa zak y sigui zak den un vecindario di e cadena di islanan na entrada di Caribe, cu a habri siman den un situacion sumamente dificil.
Philippe a dicidi cu e ta sigui su ruta y a cuminsa subi y den esaki alarma a wordo bati sigur despues cu Barbuda y Antigua a wordo afecta.
E parti mas Noord di region di Caribe a cuminsa prepara su mes.
Dia 4 di October entre otro Sint Maarten tabata na careda mientras Philippe tabata mas cerca y laman a cuminsa bira hopi bruto.
Medidanan a wordo tuma pa alerta pa Philippe cu lo a percura pa entre otro islanan Aruba, Bonaire y Curacao no lubida su nomber.
Na varios ocasion DIARIO a mustra Aruba, cu ora tin un sistema tropical den vecindario, no necesariamente e sistema mes ta provoca condicion fastioso di tempo.
E Zona di Convergencia Intertropical riba Venezuela y den e temporada aki riba region di Aruba mes, ta activa y ta contribui na e dinamismo necesario pa un sistema tropical mantene su mes na bida.
E posicion di Philippe a haci cu e por a activa e Zona di Convergencia Intertropical cu tabata hopi trankil durante e temporada di horcan 2023 por lo general.
E rumbo di Philippe Noord West tabata contribui na e desaroyo aki y asina e islanan Aruba, Bonaire y Curacao ta parti di e region caminda por spera awe ainda awacero acompaña pa strena y lamper mientras Philippe no a muri pero a haci cu hasta na Merca, preparacionnan ta wordo haci pa su presencia.
Durante e temporada 2023, Aruba a haya sigur tur indicacion di sistemanan tropical cu e mester ta prepara pa loke por pasa den un clima cu a cambia.
Calor intenso, laman cayente, poco biento ta alimenta situacionnan cu ta produci yobida pisa pero tambe strena y lamper peligroso pa hende cu mester sigui reglanan di seguridad.
Mester tene na consideracion e posicion di Aruba den Caribe, cu ta mas pariba cu Bonaire y Curacao pero mas cerca di e peninsula di Paraguana.
Manera DIARIO a splica na hopi ocasion, efectonan secundario di pasashinan di tormentanan tropical, por tin resultado sigur na momento cu Aruba ta directamente bou influencia di e Zona di Convergencia Intertropical productor di yobida den e luna aki.
Prevencion den un realidad di un clima cambia sigur ta necesario despues cu Franklin y Philippe a duna prueba cu hende no ta dicidi pa sistemanan tropical.
Den esaki sigur mester tene cuenta cu condicion di laman cu ta parti di totalidad di naturalesa y den pasashi di sistemanan tambe ta wordo afecta!
