Camara di Comercio cu 4 orador cu temanan interesante pa nan evento di 24 di September

ORANJESTAD (AAN): Dia 24 di September Camara di Comercio (KvK) ta bay organiza su asina yama  Aruba Chamber Business Event un biaha mas y e biaha aki ta bay tin 4 orador.

Durante un conferencia di prensa Diahuebs mainta, miembro di board di KvK Diederik Kemmerling a elabora un tiki riba e personanan cu ta bay duna un presentacion durante e evento di dia 24.

Tres di e oradornan ta internacional y uno ta di Aruba mes.
E prome orador ta ex hungador di NFL Jacob Brown.

Segun Kemmerling, Brown ta un asina yama ‘profesional motivational keynote speaker’, pues e ta experto den duna discurso y presentacionnan pa motiva y inspira hende.

E di dos orador ta bay ta e Hulandes Martin de Boer, director comercial di Europarcs Group.

Prome cu esaki e tabata director comercial di agencia di viahe Corendon.

Segun Kemmerling, de Boer kende a yuda construi un hotel na Corsow, tin un discurso interesante riba con el a yuda guia Corendon door di e crisis di COVID.

“Nos di tres orador internacional ta Romilde van Commenée di Corsow, kende a skirbi e buki ‘Happy Leader”.

E ta bay papia riba con pa lidera teamnan na un manera exitoso, segun Kemmerling.

El a bisa tambe cu e orador local ta managing director di Ennia Henry v/d Berg, kende ta bay papia riba su contribucion na e exito financiero di e compania den e ultimo 7 añanan, como tambe riba con el a yuda Ennia pasa door di e crisis di COVID.