Minister Maduro a splica en corto:
ORANJESTAD (AAN): Un di e 13 recomendacionnan cu CAFT a haci na gobierno ta pa drecha 'compliance' na Departamento di Impuesto. Riba esaki, Minister di Finansa y Cultura, Xiomara Maduro, a expresa den conferencia di prensa dialuna mainta cu CAFT kier pa DIMP bay cobra pueblo 20 miyon florin.
E mandatario a sigui bisa cu otro recomendacion ta bay riba AZV. Locual CAFT ta pidi en corto ta pa corta den mas gasto di AZV y pa laga pueblo paga mas pa locual ta docter y remedi.
E recomendacion di CAFT number 8 ta bisa a no yuda esnan cu malesa cronico ora ta referi na e 'begrotingsfonds' apart pa compensa eigenbijdrage di AZV.
Number 9 ta e sistema di riolering di RWZI na Bubali Plas. Akinan si ta pone kico ta e consecuencia ta pa laga e muraya cu tin eynan kibra numa, laga awa sushi bay over, bay lama, bay banda di hotel, riba Sasakiweg cu tur consecuencia cu esaki tin, a bisa.
Banda di esaki, e recomendacion di CAFT ta pa tin un surplus den 2023 y esey kiermen corta 286 miyon florin den presupuesto di 2023. Si corta esey, por ehempel, e suma ey ta mas grandi cu e suma cu tin presupuesta pa ful locual ta enseñansa na pais Aruba, Xiomara Maduro a enfatisa.
CAFT kier tambe pa cambia e escenario di crecimento economico. Akinan tin un parti tecnico, pero den forma simpel bisa ta pa "ban haci manera gobierno ta bay cobra e ora eynan mas placa for di economia den 2022", a señala.
E recomendacion number 12 ta introduci BTW lihe y pa cu esaki sino ta introduci esaki, e ora, mester corta 400 miyon den presupuesto 2023. Esey ta ekivalente na corta tur locual tin presupuesta pa e parti di educacion, plus un parti tambe di e parti di husticia. "Asina grandi e corta lo mester ta e ora eynan den presupuesto di pais Aruba", a bisa.
E ultimo recomendacion di CAFT ta pa cobra comercio e subsidio di salario cu a wordo paga di mas, pero haci esaki mas lihe, Minister Xiomara Maduro a splica dialuna mainta den rueda di prensa pa loke ta e consehonan di CAFT y e respectivo reaccion di gobierno.
