Ley di Cacho ta funciona? - ORANJESTAD (AAN): No ta algo nobo, pero si un situacion cu a cuminsa tin su consecuencianan.
For di basta tempo caba, diferente habitante a bin ta pidiendo atencion pa e tantisimo cacho cu tin ariba caya den e bario. E cachonan aki ta stroba hende di jog, di djis sali cana haci un tiki movecion. Nan ta te hasta teroriza esnan cu ta core bicicleta.
Mayoria di e cachonan aki tin doño. Leu leu por topa algun cacho solitario cu ta yega na e bario, cu ta mustra di ta perdi of cu a wordo bandona eynan, pero tambe por mira otro cachonan cu ta cana hunto, cu banchi na nan nek, cu ta bida den e bario y cu ta conoci cu tin doño.
E cachonan aki ta causando teror cerca varios famia. Algun siman pasa, un par di e cachonan aki a habraca un pushi di cas y mat'e. Siman pasa, otro pushi cu tabata drumi den patio di su cas a bira victima di dos cacho cu a drenta den e propiedad.
Ta trata di pushinan cu a wordo adopta, sterilisa y cuida door di famianan cu ta biba den e bario. Pushinan cu no ta molestia ningun hende pasobra henter dia nan ta drumi of ta chill rond di e cas mes.
Pero, e biaha aki, un di e pushinan aki no por a defende su mes (pasobra no ta prome biaha cu e tin cu lucha contra e cachonan cu ta drenta den cura) y haya su mes mordi y herida malamente na su barica y nek.
Si no tabata pa e hecho cu tabata tin un habitante den e cas e momento ey cu a tende un desordo y a sali tira un bista y a topa e pushi den e boca di un di e cachonan, e pushi ey no lo tabata na bida mas.
Ta masha tristo loke un famia ta sinti ora cu un di su mascotanan stima ta wordo ataca di e forma aki siendo cu tin un ley cu ta bisa cu si bo tin un cacho, e cacho aki mester ta den cura di cas (no den cura di e bishiña ni ariba caya) y no meymey di caya atacando otro bestianan of e habitantenan.
Apesar cu tin un Dog Unit cu ta traha cu Bureau City Inspector ta sinti cu ainda falta masha hopi pa wordo haci pa atende cu e asunto aki di bestia ariba caya y cu pa colmo tin doño.
Ora di yama Bureau City Inspector nan ta bisa cu mester yama Polis. Ora di yama Polis, Polis ta bisa cu esnan perhudica mes tin cu atende cu e doño di e cacho.
A yega ora pa cuminsa atende cu e problematica aki den un forma serio pasobra ta mira cu tin masha doño di cacho cu no ta cumpliendo cu e ley di cacho, ya sea pasobra nan cacho ta cana pariba y pabao, of pasobra nan tin un cacho cu ta wordo neglisha (e cacho no tin un dak pa refugia, ni awa pa bebe of nan ta mara na un cabuya cortico, pa menciona algun di e situacionnan).
Riba potret por mira con e pober pushi a keda tur herida despues di e atake di e cacho.
{gallery}Cachonan habitantenan di Wayaca Residence fada{/gallery}
