Cacho cu a bira viral riba social media a resulta di ta un ‘cacho di cunucu’ procedente di Aruba

Team di Miami Marlins Baseball na Merca a logra localiza e mascota

 *Cacho a bira viral ora cu “e no a haya un treat” 

ORANJESTAD (AAN): Siman pasa un video a plama tur rond riba social media na Merca, y hendenan na Aruba tambe a mire!  Riba e video popular aki por a mira con durante un actividad na stadion di Miami Marlins, yama ‘Bark at the Park’ unda publico por a bay cu nan mascota, tabata mira con un cacho a keda un banda ta wak otronan ta come hot dog... y na final e mes no a haya ni un hap di e delicioso pasaboca.

   Ora cu e video a bira viral, mesora gerencia di mercadeo na Miami Marlins a dicidi cu nan kier drecha e eror aki, y a cuminza busca forma pa localiza e cacho aki y su doño.  Pasobra ta tur hende a cuminza busca pa haya sa, kende e cacho aki ta... e pober cacho cu no a haya un hot dog.

   A sali na cla cu e cacho su nomber ta ‘Jonah’ y cameranan di TV a capta con e cacho aki tabata mira di banda pa mira con un otro cacho ta disfrutando di e hot dog, y e mes no a ni purba na hort’e, pasobra di berdad e ta un bon cacho.

   Pesey Miami Marlins a emiti un mensahe riba Diamars 23 di Juni 2026 pa trata na localiza e doño pa asina nan duna e mascota su recompensa.  Asina e doño, Peter Silveira a reacciona riba publicacionnan riba social media, y el a informa tur hende cu e cacho yama Jonah.  El a bisa tambe cu hobby di e cacho ta pa core tras di eekhoorn y come ice-cream.

   Cacho di Aruba: Asina famia Silveira a divulga, cu Jonah ta un cacho di cunucu cu a nace na Aruba.  El a wordo haya abandona riba e isla, y a wordo rescata.  Danki na organizacionnan local na Aruba, a yud’e pa haya examinamento di Veterinario, ricibi tur documento, y por a logra wordo poni riba avion rumbo pa Florida pa biba cu famia Silveira.

   Awor ta monton di medio di comunicacion ta publicando na Merca di e raza di cacho aki cu ta ser yama ‘cunucu’, un raza comunmente haya na Aruba.  Nan a adopta e mascota cu yudansa di Fundacion New Life For Paws di Aruba.

   Invitacion pa Jonah: Awor cu Miami Marlins a haya sa ta kende ta e doño di e “dog hot dog” cu a bay viral, nan a prepara pa duna Jonah y su doñonan un asina yama ‘Dream Day’ na e stadion di Loan Deport Park na Miami, riba Diadomingo 12 di Juli 2026 venidero.   Tambe ta yuda recauda fondo pa yuda demas cachonan cu ta wordo rescata. 

   Pero contrario na e evento di “Bark at the Park” di luna pasa, pa Diadomingo awor sinembargo lo no permiti pa drenta cu cacho.  Solamente e cacho Jonah a wordo invita pa tey presente, y tur camera lo tey pa asina capta e momento aki ora cu e cacho di cunucu di Aruba lo haya su merecido recompensa.

   Bira popular: Prensa na Merca ta dedicando atencion tambe na e fundacion New Life for Paws di Aruba, mustrando cu e organizacion di boluntario tey pa “rescata lo mas hopi cacho di caya, abandona, of neglisha na Aruba, y tambe yuda pa opera e cantidad di cacho di caya na Aruba.”

   Mientras tanto no ta djis canalnan local di TV na Miami a cubri esaki, sino varios noticiero di rond Merca, y tambe networknan manera ABC News, Fox Network, y mas a pasa video di Jonah, cu e storia di ‘Cunucu dog from Aruba’, y te hasta programanan popular manera ‘Inside Edition, pero tambe corantnan grandi manera USA Today a haci cobertura.   Riba social media el a plama riba TikTok, Instagram, y tambe e plataforma di X.  Anto awor pa colmo e cacho a hasta haya su mesun cuenta di Instagram na @jonahthecunucu