89 pais y 220 estado rond mundo a sigui e presentacion - ORANJESTAD (AAN): Servicio Informativo di Gobierno (Bureau Voorlichting – BUVO)
kier a gradici tur persona cu a sigui presentacion di resultado provisional di eleccion 2021 riba e websitenan di gobierno riba anochi di eleccion.
E website a haya un excelente acogida cu mas di 25 mil hits (253.239) riba anochi di eleccion y e dia siguiente. En total 89 pais y 220 estado rond mundo a sigui e presentacion, entre nan di Hulanda, Merca y Canada. Pa Hulanda e top 5 estadonan cu a sigui e presentacion ta Zuid-Holland, Noord Holland, Noord-Brabant, Utrecht y Gelderland. Di Merca ta Florida, New York, Texas, California y New Jersey. E paisnan cu mas a bishita e websitenan ta Aruba, Hulanda, Merca, Colombia y Canada.
BUVO kier a gradici e dinamico y experto team di Directie Informatievoorziening en Automatisering (DIA), cu ta encarga cu e maneho tecnico di e websitenan menciona, pa e excelente cooperacion, apoyo y conseho valioso den e periodo pa preparacion pa eleccion 2021. Ademas e gradicimento special na DIA pa desaroya e tremendo aplicacion pa website di gobierno pa por a haci e presentacion aki posibel, como tambe pa e apoyo y colaboracion inmenso ricibi pa e presentacion di e resultadonan di eleccion riba anochi di eleccion. Tambe un danki special na DIA pa traha e Excel sheet sumamente popular pa yena resultado di eleccion.
Varios medio di comunicacion y empresanan, a haci uzo di e formulario, por ehempel como pop up cu e resultado di eleccion.
Tambe un danki grandi na e coleganan di BUVO, pa nan aporte durante temporada electoral y riba e anochi di eleccion. Danki tambe na SIM Caribbean pa e sosten ricibi.
Nan gradicimento tambe ta bay na prensa pa nan cooperacion y pa consulta nan paginanan di eleccion y di presentacion di resultado provisional eleccion 2021. Tambe a constata cu a uza varios pics di nan pagina di eleccion 2021, manera e cantidad di voto pa partido político y e tan gusta mapa electoral.
Esnan cu ta interesa pa wak e resultado di voto individual 2021, esta e cantidad di voto pa cada candidato na cada urna electoral (voto individual), por haya esaki riba e homepage di e websitenan di gobierno, prome slide di e carrousel Voto individual 2021, unda por click riba “Scoge partido” y “Scoge candidato”, pa haya sa cuanto voto e candidato a haya na cada urna, como tambe pa disticto. Tambe por haya informacion di votegetter 2021, e.o. top vote-getter pa partido 2021, top 20 vote-getter 2021.
