Bunita parada di carnaval lidera pa Colegio Laura Wernet-Paskel yen di color y creatividad

“Hubentud divino tesoro”

ORANJESTAD (AAN) – “Juventud divino tesoro”! Palabranan cu cual e gran poeta Nicaraguense Ruben Dario ta titula y ta cuminza un di su poemanan di mas bunita y famoso. Berdad, Hubentud ta un divino tesoro, cu ta trece alegria y speranza den nos seno familiar, na scol, y tur caminda unda tin presencia di hoben. Nan ta protagoniza momentonan feliz colma di bunita sonrisanan!

Nos colega Hubert Tiel a duna cobertura na e parada di scolnan di Santa Cruz, lidera pa Colegio Laura Wernet- Paskel, y ta comparti cu nos pueblo e bunita potretnan hunto cu e articulo aki.

Diabierna 2 di februari 2024, muchanan di Colegio Laura Wernet-Paskel na Kadushi Largo pa di su 45 aña a celebra Carnaval cu un parada, conhuntamente cu participantenan di otro scolnan di bario di Santa Cruz.

Nan parada a sali 5:30’or di atardi for di parkeerplaats di Colegio Laura Wernet Paskel. E parada ta bira na e crusada di Seroe Compa y Kadushi Largo, bay pariba direccion Angochi y ta lora despues pa termina riba e veld di Sportboys Club. Colegio Laura Wernet-Paskel tabatin como tema e aña aki: “Musica ta Bida”.

  Tur aña muchanan di diferente scolnan di cuido, preparatorio y scolnan basico a participa na e parada di Carnaval. E aña aki a compaña e Parada:

• Curason Contento cu e tema Indian.
• Sint Jan Kleuterschool cu tema di “Candy Land.”
• Cacique Macuarima cu e tema di “indian den celebracion.”
• Colegio San Hose cu tema di “Shoconan di San Hose ta hisa benta den 70.”

 Y e aña ki un bez mas De Schakel basisschool tambe a participa na e parada, cu e tema di “Jungle”.

Masha pabien na tur e scolnan aki cu nan bunita parada yena cu alegria y sabor di hubentud.