“Bunita pa mira tur e hobennan cu a gradua di educacion profesional basico unidad servicio”

Prome Minister Evelyn Wever-Croes:

ORANJESTAD (AAN): Prome Minster Evelyn Wever - Croes tabata presente na e graduacion di studiantenan di EPB, representando Minister encarga cu enseñansa y henter Gobierno di Aruba.

   E anochi di graduacion tabata hopi special pa tur esnan cu ta gradua pero alavez ta un bunita ocasion pa mira tur e hobennan cu ta graduando di Educacion Profesional Basico unidad servicio. Cada un di e hobennan ta formando nan propio futuro y haciendo esaki ta forma e futuro di Pais Aruba. “Boso a scoge pa e profesion di duna y brinda servicio, sea ta den horeca, cuido of ‘dienstverlening’. Educacion ta e pilar y e base firme y fuerte den cada un di nos bida y awe bo ta mira cu tur esfuerso y sacrificio ta duna su fruto.”

   Prome Minister a conseha cada un graduado pa semper keda enfoca riba nan meta y no laga nada kitabo for di bo meta. Fiha locual cu bo ta desea y bay pe cu positivo y fe cu bo lo logra.

   Pa conclui, Prome Minister a gradici henter e staff y docentenan cu a guia tur studiante pa yega na e exito di awe y tambe tur mayor y famia cu a yuda tur e studiantenan pa gradua y logra nan meta. Y na tur e graduadonan Premier Wever - Croes a bisa: Nunca lubida ken y con hopi nan a yudabo. hopi exito den etapa nobo y “Be the best that you can be y asina nunca lo bo arepenti”.