Bunita homenahe na Birgen di Fatima na Misa di Dakota

ORANJESTAD (AAN) – Tabata Diahuebs anochi, den e Misa Birgen di Fatima na Dakota, a rindi homenahe na Birgen di Fatima, y a conta cu asistencia di hopi fiel creyente y devoto.

E imagen di Birgen di Fatima a wordo carga den procesion y el a drenta den e templo acompaña pa Pader Jairo Maduro y Pader Szpila, y hopi devoto, y despues a ofrece un Santo Sacrificio di Misa. Un coro hubenil a entona canticanan masha bunita, na honor di Mama Maria di Fatima. Manera ta conoci e celebracion universal di Dia di Birgen di Fatima ta dia 13 di Mei, pa conmemora su prome aparicion na Cova da Iria, na Portugal, na 1917.

E dia aki Mama Maria di Fatima a aparece dilanti di Lucia y su primonan Francisco y Jacinta Marto, cu tabata biba na un pueblo yama Aljustrel, na Fatima. E muchanan aki tabata pastor di e rebañonan di nan famianan. Den e ocasion aki, historia ta conta, Mama Maria a bisa e pastornan aki cu e lo bolbe durante e siguiente seis lunanan tur 13 di luna na e mesun ora, y asina a cumpli tambe.

Pero ta dia 13 di October di 1930 cu Obispo de Leiria a proclama e aparicionnan di Birgen di Fatima, como autentico.

Riba combinacion di potret por aprecia imagen di e homenahe haci na honor di Birgen di Fatima.