ORANJESTAD (AAN): Bucuti & Tara Beach Resort, Aruba, ta pone e standard di oro den hospitalidad di luho un biaha mas segun Forbes Travel Guide, US News & World Report y Booking.com.
Pa e segundo aña consecutivo, e resort exclusivo pa adulto a gana e Forbes Travel Guide Recommended Award. Na mesun momento, e ta sigui mantene su status di excelente como e hotel di Aruba cu e rating mas halto riba Booking.com. Completando e reconocimento recien aki den hospitalidad globalmente reconoci, Bucuti & Tara ta prolonga su trayecto di excelencia door di haya e prestigioso Gold Badge di U.S. News & World Report den su 2025 Travel Awards.
Un biaha mas, Bucuti & Tara a worde nombra como e Hotel No. 1 di Aruba y ta clasifica entre e Top 25 Resortnan den Caribe.
Bucuti & Tara a worde nombra como Forbes Recommended den Forbes Travel Guide su 2025 Star Awards
Forbes Travel Guide: Esaki ta e unico sistema di clasificacion global pa turismo di luho, a anuncia su 2025 Star Awards riba 12 di Februari, y pa e segundo aña consecutivo, Bucuti & Tara ta gana un Forbes Travel Guide Recommended Award. Forbes Travel Guide ta un autoridad mundialmente reconoci den excelencia di hospitalidad, y Bucuti & Tara ta uni un biaha mas na e prestigioso Star Rating List anual.
“E ganadornan di e Star Awards di Forbes Travel Guide ta un ehempel di excelencia den hospitalidad,” ta loke Amanda Frasier, President di Standards & Ratings di Forbes Travel Guide a declara.
"E lista di e aña aki ta sigui refleha e paisahe di luho cu ta evoluciona, cu propiedadnan cu ta pone e standard pa experiencianan autentico mientras ta brinda facilidadnan sin igual, bienestar avansa y momentonan inolvidabel. Nos ta emociona di reconoce nan dedicacion pa crea opcionnan di turismo berdaderamente di clase mundial pa e huesped exigente di awe."
Conkistando Oro cu US News & World Report: Bucuti & Tara ta sostene e reinado mas largo como Hotel No. 1 y Resort No. 1 di Aruba, segun US News & World Report. E reconocimento deseabel aki ta resalta e compromiso incansabel di Bucuti & Tara na hospitalidad di clase mundial, servicio personalisa y luho eco-consiente. Como e prome y unico hotel carbono-neutral den Caribe, e resort ta ofrece un experiencia di huesped berdaderamente sin igual na Aruba, combinando elegancia sereno bandi lama cu practicanan di sostenibilidad avansa.
Bucuti & Tara ta honra di por sigui pone e standard di excelencia den e region. Huespednan por spera estadia inolvidabel caminda relahacion , romanticismo y turismo responsable ta uni hunto.
Hotel No. 1 di Aruba segun Booking.com: Entre e noticianan di premio, Booking.com a otorga Bucuti & Tara e rating mas halto entre tur propiedadnan na Aruba. Cu un clasificacion consistente di 9.6 for di 10 aña tras aña, Booking.com Traveller Review Awards 2025 ta clasifica Bucuti & Tara na e nivel di excelente, asina dunando huespednan confianza den nan seleccion di biahe.
E premionan reciente aki ta un refleho di e dedicacion incansabel di e personal di e resort, asegurando cu huespednan ta disfruta di un di e experiencianan di turismo mas desea den mundo. Na final di Januari, 15 empleado a worde honra pa nan aniversarionan . Di e 142 miembronan di ekipo, 53 tin cinco aña of mas na Bucuti & Tara, y di nan, 70% a celebra 10 aña of mas na e resort.
