Bubali Plas a wordo traha 50 aña pasa pa procesa 4500 m³ pa dia

Director DOW: “Bubali Plas ta overbelast”  --- *Awo DOW ta ricibi 8000 pa 8500 m³ diariamente

ORANJESTAD (AAN) – Director di Departamento di Obranan Publico (DOW), Ing. Marlon Croes, a yama un conferencia di prensa den cual a duna informacion tocante e status di Bubali Plas y RWZI Bubali.

            Pa cuminza, Marlon Croes a gradici prensa pa ta hopi critico y ta hiba DOW na e siguiente nivel pa nan mes operacion draai y mehora. Seguidamente, el a expresa cu DOW ta conoce e situacion di e Plaza Bubali, cu a wordo poni den funcion na aña 1972.

            “E ta un planta cu ta cumpli cincuenta aña y cu a wordo dimensiona pa procesa 4500 m³  pa dia. Cu nos desaroyo economico di ultimo añanan, nos a crece extensamente, den e cantidad di cambernan di hotel y consecuentemente, e produccion di awa di baño a  aumenta drasticamente, cu basicamente nos ta ricibi di 8000 pa 8.500 m³  pa dia. Esaki ta trece cune cu nos planta awo ta overbelast, si e tabata den bon condicion mes”, Marlon Croes a señala.

            Croes a agrega cu e reto grandi ta cu DOW tin tambe, ta cu ta conoci cu rond mundo gobiernonan ta campeon den pone cosnan nobo, pero ta pesimo den mantenimento. “Na Aruba no ta diferente y tambe ta sosode cu nos a bay atras den e planta, aunke nos a bringa hopi duro pa tene den bon condicion y operacional, bao e circumstancianan cu nos ta. Esey ta e RWZI Bubali”, Director di DOW a señala.