ORANJESTAD (AAN): Diahuebs anochi, tanto Polis cu Ambulance y tambe Brandweer a sali rumbo pa un accident di vehiculo na Mondi Fierno, unda un Pickup a dal contra un hydrant, y despues a kenter.
Na e lugar a resulta cu e chauffeur femenino a resulta herida, y a wordo hiba pa Hospital cu Ambulance.
Pero semper tin e pensamento y e teoria, kizas por tabatin mas hende den e pickup, of hasta sinta den e baki patras. Si acaso el a bolter y kenter... chens ta cu e hendenan aki tambe lo por a zwaai y bay cay den mondi of no.
Aki DIARIO a mira un Bombero canando cu un asina yama FLIR Thermal Imaging Camera den su man. Cu e camera aki tabata dirigi e lens den direccion di mondi, cadushi, yerba, y demas matanan banda di caminda, pa mira si lo por tin ‘mas victima’ cu por a cay eybanda pero no por wordo mira cu wowo.
Na Hulandes e ta wordo yama “Warmtebeeld Camera”, y ta casi tur Cuerpo di Bombero na Hulanda tin uno pa no djis check unda tin hotspot scondi den candela di cas of edificio, pero tambe ta check ora cu tin accident di auto anochi, pa usa e camera pa mira si acaso lo por tin victima cu a sali manera catapult for di auto y cay den mondi of den mata. E camera ta detecta cualkier calor di e curpa humano of animal, y esaki ta aparece riba e pantaya.
Un berdadero herment util cu Cuerpo di Bombero porfin tin na su disposicion.
Por corda bek den decada di 1980 cu un accident a socede riba caminda principal poco pabao di cruzada di Mahuma, unda un accident a socede marduga. No a haya ningun hende na e lugar. Te mainta despues cu solo a sali, hendenan a bin descubri un curpa humano den e yerbanan halto eybanda, y cu no tin señal vital mas. Ya caba e cadaver a bira stijf tambe.
Si e tempo aya tabatin e Thermal Imaging Camera (TIC) aki, lo por a detecta e curpa benta den mondi y por a dune asistencia ainda kizas na tempo.
