Boto cu a bay rescata un otro tambe a haye den problema

Riba lama noordwest di Corsou

WILLEMSTAD: Centro di Operacion Maritimo (MOC) di Wardacosta di Caribe Hulandes a ricibi Diahuebs mainta un peticion pa asistencia di un boto piscado cu problema cu motor riba lama noordwest di Westpunt na Corsou.  Abordo di e boto aki yama Charnelle, tabatin dos piscado Curasoleño.

   Despues di a ricibi e melding, mesora Centro MOC a laga Helicopter di Wardacosta lanta vuelo pa bay tira un bista di loke ta pasando.  A sali na cla cu abordo di e boto di piscado aki nan no tin ningun VHF Marine-radio.  E dos piscado tabatin solamente un celular abordo pa mantene contacto.  Nan dos a avisa cu nan a caba di pidi amigonan pa bin yuda nan, y na ta na caminda cu un otro boto piscado pa duna asistencia.

   E otro boto piscado cu a bin yuda yama ‘Arca’, pero pa malasuerte nan tambe a confronta problema cu nan motor.  Pues nan no por yuda e boto Charnelle cu nada.

   E ora Centro MOC a bolbe laga e Helicopter bay bek na e lugar pa asina hisa e dos piscado for di Charnelle.  Tambe mientras tanto a notifica e organizacion CITRO, y tambe a manda un Metal Shark pa bay eynan.  E avion Dash-8 di Wardacosta tambe a lanta vuelo pa keda vigila.

   Ora cu e Helicopter a yega bek, e dos piscado a wordo hisa for di Charnelle abordo.  Despues nan a entrega awa y cuminda na esnan cu ta abordo di e otro boto Arca.  Pero poco despues esnan abordo di Arca a logra cende e motor bek, pues riba nan mesun forza nan por regresa Playa Piskado.

   E organizacion CITRO a yega, y nan a dicidi na lastra y trece e boto Charnelle rumbo pa Playa Piskado.

   Wardacosta di Caribe Hulandes un biaha mas ta enfatisa e importancia pa bo tin bon medio di comunicacion abordo.  Djis bay cu un celular como medio di comunicacion no ta suficiente.  Ora cu un celular stop di traha, of no ta ricibi señal, of bateria baha, e contacto ta ser perdi.  Un VHF Marine-radio abordo ta un forma confiabel pa tin contacto cu Wardacosta y demas botonan.