WILLEMSTAD: Tabata Diamars anochi pa Diaranson mainta, cu e marine radar di Centro di Operacion Maritimo (MOC) a detecta un boto ta moviendo entre Klein Curaçao y Curaçao.
Mesora a saca e avion Dash-8 cu a bay eynan pa purba identifica e boto. Despues di a mira cu ta trata di un lancha cu yen di hende abordo, Wardacosta di Caribe Hulandes a core saca un boto di intercepcion tipo Metal Shark pa move rumbo pa eynan.
Aki nan a bin topa cu un boto tipo Yola, cu tin abordo 34 persona indocumenta. Ta trata di 24 homber y 9 muher, y tambe un mucha di 2 aña di edad. Tur di nan ta di nacionalidad venezolano.
Metal Shark a lastra e boto rumbo pa e Pier di Wardacosta, unda nan tur a wordo entrega na oficialnan di Cuerpo Policial di Curaçao.
