Informacionnan di DIARIO na ciere di edicion ta motibo di alarma
- Peticion pa Presidente Biden introduci sancionnan Venezuela atrobe
ORANJESTAD(AAN)- Na momento cu ayera DIARIO tabata prepara pa su edicion di awe, informacionnan clave a drenta tocante e situacion cu ta desaroya na Venezuela.
Informantenan clave, cu a percura pa DIARIO por a splica Aruba cu e acuerdo pa eleccionnan limpi na Venezuela entre Merca y Venezuela ta muriendo, a splica cu 2024 por mira luz den desaroyonan democratico ta parce un ilusion cu lo no bira realidad.
Na ciere di e edicion di ayera alarma grandi a wordo bati den porta di 2024 caminda eleccionnan presidencial di Venezuela, ta central riba agenda di e region Latina Americano y Caribe cu pa su seguridad mester di trankilidad politico na Venezuela.
Manera ta conoci Merca a dicidi di deshaci di su sancionnan contra Venezuela loke a haci cu Nicolas Maduro a haya posibilidad pa aumenta e entrada di su regimen Venezolano pero cu e condicion cu e lo apoya eleccionnan democratico.
Ayeranochi, sinembargo, informacionnan clave na nivel internacional a indica cu e regimen di Nicolas Maduro a trapa riba e acuerdo pa eleccion liber y cu actualmente persecucion di e candidata Machado cu mester a representa Oposicion Venezolano, a bira oficial.
Autoridad penal di Venezuela a cuminsa cu persecucion di Machado cu a duna di conoce cu e no ta bandona su decision pa participa como cantidata di Oposicion di Venezuela na e eleccionnan di Venezuela.
Instancianan oficial controla pa regimen Nicolas Maduro lo ta duna inicio na persecucion di Machado mientras cu den exterior voznan a cuminsa lanta pa Presidente Biden di Merca imediatamente revoca e acuerdo entre Merca y Venezuela cu a habri porta pa regimen di Nicolas Maduro haya entrada sumamente grandi.\
DIARIO ta den contacto cu informantenan clave na nivel internacional pero ya por anuncia cu e situacion regional di Aruba ta bira sumamente tenso y cu ya por considera cu tin atencion di maximo seguridad den e region a base di e situacion explosivo na Venezuela.
DIARIO lo sigui informa su lectornan pero informantenan ya ta mustra cu publico sigur mester duna tur sosten na autoridad cu sosten di seguridad nacional mientras e situacion politico na Merca cu pa medio di petroleo y lazonan mundial, ta bira explosivo den un situacion mundial di halto gravedad.
