Boluntarionan di 'Happy Heart Club' a cushina dushi pa grupo Hunto Grandi Grandi Hunto

Jacinto Kelly hopi contento cu e reto:

ORANJESTAD (AAN) – Den un entrevista cu DIARIO, Jacinto Kelly, a duna di conoce na DIARIO, cu nan a haya un peticion pa Happy Heart Club, busca un par di boluntario, pa cushina pa e grupo Hunto Grandi Grandi Hunto.

Kelly, di 'Happy Hard Club' a comenta cu nan a traha un cuminda, un apetizer y un postre. Nan a traha un sopi di pampuna, papaya stoba cu carni cabrito y rabo. Fuera di esey a bati pan y a hala funchi. Cada un di e grandinan a haya un pida, y a traha un bolo di cashupete tambe, pa nan.

Kelly a comenta cu antes no tabata tin mucho variacion di cuminda, fuera di concomber, bonchi, etc. Pa cushina pa e grandinan nan a scoge papaya, nan a steam e rabo y den e grupo nos a parti e trabao. Cada hende a haya un tarea pa haci.

“Contento tambe di a wordo acerca y cu nos a acepta tambe pa yuda nos grandinan cu algun cuminda. Esaki ta algo hopi great y bon di nos parti, y asina nos ta purba hunto cu nos grupo tambe, yuda mas tanto adulto mayor cu ta posible”, Jacinto Kelly a señala.

Happy Heart Club ta un grupo hopi activo, cu ta consisti di mas of menos 55 miembro y nan tin un lista di spera, cu ainda nan por forma otro grupo, señor Kelly a menciona.