Boluntarionan a bay yuda drecha 19 di e luznan aki di e Linear Park na Malmok

ORANJESTAD (AAN): Tabata luna pasa riba Diahuebs 10 di Maart, cu e president di Tourism Product Enhancement Fund a haci denuncia na Polis, cu hende desconoci a kibra un total di 19 di e luznan di e Linear Park na Malmok.

   Ta trata di e proyecto di Linear Park di Palm Beach pa Malmok, unda a instala luznan chikito pa ilumina e looppad pa hende cana.  Ta trata aki di lampinan hinca tanto den beton como tambe den plastico.

   Luna pasa a bin nota cu tin 19 luz cu a wordo destrui door di hendenan desconoci.  A mira cu e luznan aki a wordo destrui intencionalmente, y pesey a dicidi na entrega keho na Polis.

   Sigur ta di lamenta cu hendenan cu mente anti-social ta comete e acto aki.

   Pero fe den humanidad tey ainda!  E siman aki, riba Dialuna mainta por a mira varios persona trahando riba e looppad di e Linear Park na Malmok. Segun por a compronde cu ta voluntarionan hunto cu e compania Good Luck & Key Service a bay haci banda di e walkway limpi y tambe a drecha e luznan cu malhechornan a kibra.

   Sigur ta un bunita gesto di parti di e compania aki cu ta stima Aruba y a yuda pa mantene e lugar limpi y tambe drecha cu loque a worde kibra.