Bo tin cu planta e simia pa bo logro bo soñonan
ORANJESTAD(AAN): Dentro di poco e compania di Real Estate, Bold, ta bay cumpli 1 aña di existencia.
Ta un compania cu a wordo lanta pa Aileen Kelly y Jenniffer Figaroa. Kelly añanan atras a cuminza traha den customer service na un banco, despues di cual el a traha 10 aña na un compania di real estate unda el a siña hopi. Na dado momento el a dicidi di cuminza riba su mes.
El a topa cu Figaroa, kende un tempo tambe tabata traha pa un banco y hunto nan a brainstorm pa cuminza cu Bold.
“Destino a pone ami cu Jenniffer hunto y nos a cuminza cu Bold, cu ta nos baby”, segun Kelly.
Figaroa a conta cu e compania ta consisti di 7 hende muher ‘empowered’. El a splica cu ta importante pa tin un bon mind set y planta e simia, pa bo logra bo soño.
“Si bo no planta e simia bo no ta logra bo soño”.
Bo ta planta e simia y mester dune cuido y amor pa bo por wak e florece. Como hende muher nos ta bon capacita pa por logra we soño cu nos kier, pero bo mester djis tin e gana y e curashi, segun Figaroa.
Kelly di otro banda a splica cu e compania ta bayendo hopi bon y cu tin hopi mas porta pa habri. “Nos ta contento cu nos logronan, no solamente pa loke ta venta, pero tambe e cultura y e vision cu nos tin den nos compania”, segun Kelly.
Apesar di e hecho cu Aruba tin mas compania di real estate y e isla ta chikito, e damanan di Bold ta indica cu cada compania por logra na su manera y e forza di Bold ta cu e ta un compania cu ta innova y ta keda un paso dilanti, segun Figaroa.
“Innovacion ta un parti importante di nos compania y nos sa kico nos ta haci”, segun Kelly, kende a indica cu si cos sigui bay bon sigur Bold lo bay expande.
“E bunita di nos compania ta tambe cu nos ta local, pues nos ta un ‘local brand’ y djis imaginabo un local brand eyfo”, segun Figaroa.
El a splica cu locual ta haci e compania fuerte tambe ta e team work dentro di Bold, unda cu ta importante pa motiva otro. Segun Figaroa real estate na Aruba ta bay sigui crece y bo ta ripara cu balor di e cas y propiedadnan ta bay sigui subi.
Dentro di poco ta Dia di Hende Muher pesey Kelly y Figaroa nan mensahe ta cu hendenan muher sigur por logra cosnan grandi. “Bo mester tin bo vision y bay pey y si na caminda cos bay malo, bo ta siña di esaki y sigui bay”.
Si un porta cera bo ta purba otro porta y si esey no logra bo ta drenta via bentana, segun Kelly. Figaroa a amplia, bisando cu hendenan muher sigur poor yega leu, pasobra hendenan muher a nace pa maneha diferente cos y diferente situacion.
“Bo por pone nos unda cu ta y nos lo logra, ta djis e ‘mindset’ bo mester tin”, segun Figaroa.
Pa loke ta nomber di e compania, Kelly y Figaroa a wak na un manera profundio den nan mes y nn a realiza cu nan a yega eynan door di tin curashi di purba y pesey a bin cu e nomber ‘Bold’. “Bold ta conta tambe pa e cliente, pasobra e cliente mester tin e curashi di tuma quizas e decision mas grandi dui su bida ora cu e dicidi di inverti den un propiedad”, segun Figaroa. E slogan di Bold ta: ‘Your Move is our Priority’
