CARACAS: Hendenan local y bishitantenan a keda mas di 2 ora pega den Parke Nacional Waraira Repano, mihor conoci como e sero El Avila,
despues di un fayo tecnico cu a wordo raporta na e Teleferico riba Diadomingo anochi.
Mesora equiponan di rescate, cuerpo di bombero, y tecniconan a bay na e lugar pa trata na evacua e hendenan cu ta “atrapa” den varios cabina colga riba e kabel di Teleferico, despues cu e motornan principal a stop di funciona.
E otro personanan cu a keda riba e top di sero El Avila, a wordo baha di eyriba abordo di vehiculonan 4x4, pasobra e motornan di spare cu nan tin pa e Teleferico, ta pa baha e cabinanan pero di forma hopi poco-poco.
Loke mas hendenan a reclama ta e hecho cu pa tur e 2 oranan aki, ningun hende tabata haya informacion kico ta pasando. Nada di detaye tabata wordo duna. Na final porfin a pone e motor di spare funciona, y esaki a keda baha e cabinanan na un forma masha poco-poco mes.
