Durante e ultimo 50 añanan...
ORANJESTAD (AAN) – Sietske van der Wal, “Conservation Education Manager” na Fundacion Parke Nacional Aruba (FPNA), a splica den entrevista cu DIARIO, tocante un proyecto nobo cu ta bay wordo desaroya, pa rebiba e coralnan parti zuid di Aruba.
Van der Wal a splica cu e polucion, cambio climatico, aumento di turismo, actividadnan den lama y pesca si no ta regula por tin su impactonan tambe riba e coralnan. “Pues, tin cierto cosnan cu sernan humano ta haci, cu a y por, impacta nos coralnan.
Y durante e ultimo 50 añanan caba, e biodiversidad marino a baha, mundialmente, cu 50% y esey no ta exclui Aruba. Aruba tambe ta cay bao di esey. Esey ta algo cu nos mester tene cuenta cune, y ta algo serio pasobra nos tur ta depende di nos lama y su biodiversidad. Door di esey, ta sumamente importante preserva loke cu tin ainda, pero tambe inverti den restaura pasobra nos mester pa e crece bek”, Sietske van der Wal a señala.
El a agrega cu si e refnan di coral no tey, no tin structura pa forma e hogar pa e piscanan. E piscanan tambe nos mester di dje pa consumo y pa e sector di pesca. Pues ta sumamente importante pa e structura ey bin bek, eigenlijk pa e piscanan bin bek y nan mes cuida e coralnan riba e structura ey.
