ORANJESTAD (AAN): Diamars durante un conferencia di prensa Secretario General Club Caiquetio Joy Fingal a trece dilanti cu e pandemia di Coronavirus a trece hopi contratempo pa tur organizacion y Aruba completo.
“A base di e contratemponan nos tin dos aña ta tambalea manera diferente otro organizacion, club y fundacion, pero nos directiva no a para keto ningun rato”.
Nos a cuminza papia riba kico nos ta bay haci pa yega bek caminda cu nos tabata prome, pero semper cu permiso di Crisis Team y DVG, segun Fingal.
El a indica cu e decision ta cu Club Caiquetio ta bay cuminza bek cu nan Bingo.
E Bingo ta bay ta riba 26 di November y ta bay ta fisicamente na Club Caiquetio y tambe via television y radio.
Fingal a indica cu varios hende tabata sigui puntre ki dia e Bingo ta bin bek y esey a duna e directiva forza pa yega na e decision pa cuminza bek cu Bingo.
“Nos ta bay bin cu algo hopi special, esta cu si bo cumpra 2 carchi, bo ta haya e di tres gratis”, segun Fingal.
El a sigui bisa cu Club Caiquetio ta hopi contento di por cumpli cu e deseo di hopi hende pa bin bek cu e Bingo.
Segun Fingal, e club semper ta para cla pa yuda diferente otro club of organizacion.
El a indica cu mantencion di e lugar tambe ta costa placa y pesey e Bingo aki ta hopi importante.
“Si cos bay bon cu e Bingo, nos lo sigui cune sigur sigur”, segun e Secretario General.
El a haci un invitacion na tur hende pa scucha e Bingo na radio, wak e na television of bay pasa ratonan ameno na e club hunto cu amigonan prome y durante di e Bingo.
https://diario.aw/categories/noticia/general/bingo-di-club-caiquetio-ta-bek-riba-26-di-november#sigProId66761002ee
