Biggy Boy Forever Concert a duna publico tur loke e tabata kier

ORANJESTAD (AAN): E tabata un weekend hopi spera!  Dos anochi sold-out a demostra claramente, cu e sosten di pueblo di Aruba pa nan artistanan propio yiu di tera, ta keto bay existi!  Y e tabata fenomenal tambe.

   Tanto Diabierna anochi como tambe Diasabra anochi a tuma lugar, e tan spera Biggy Boy Forever Concert den Renaissance Conference Center.  Y e calidad di show cu a wordo presenta, ta uno di nivel halto, cu casi nada di eror!  Pa esey, DIARIO tin di felicita tur e coordinadornan di stage, productornan, y tur esnan cu a traha tras di cortina, cu un sonido fenomenal, cu iluminacion y multimedia bon hinca den otro.

   Ademas di show di acrobacia, baile, y live band, hasta un Mariachi a presenta den e concierto aki, cu na comienzo a combina un tipo di musical riba stage, cu sigur a bira un ice-breaker pa demostra publico presente, kico lo spera nan pa e resto di anochi.

   Claro cu Jeon tabata mustra di ta sumamente satisfecho cu e reaccion, e comportacion, y animo constante di publico durante su presentacion!  Tabata un tiki conmovedor e parti cu el a dedica na su recien fayeci ruman muher tambe.

   Un palabra di pabien na Arvani Music cu e concierto aki!  Sigur uno cu a bale la pena, for di set decor, te na volumen apropia di e musica, tur hende merece un aplauso.